Луврдан ўмарилган буюмлар қанча туради? 

Франциянинг Лувр музейида содир этилган ўғрилик оқибатида етказилган зарарнинг дастлабки баҳоси 88 миллион еврони ташкил этади. Бу ҳақда Париж прокурори Лора Бекко RTL телеканалига берган интервьюсида сўз очди.

Бекко бу суммани “ҳақиқатан ҳам ҳайратланарли” деб атаган, бироқ бу фақат иқтисодий зарар экани, тарихий зарар билан қиёслаб бўлмаслигини алоҳида таъкидлаган.

Прокурорнинг сўзларига кўра, жиноятчилар ўғирланган заргарлик буюмларини шунчаки эритиб юбориш орқали 88 миллион евро даромад ололмайди. У бундай фикрни “маъносиз” деб баҳолаган ва жиноятчилар музей қадриятларини йўқ қилмасликларини умид қилган.

Қайд этиш жоиз, 19 октябрь куни Луврдан қуйидаги заргарлик буюмлари ўғирланган эди:

• Мари-Луизанинг (Наполеоннинг иккинчи рафиқаси) тўпламидан маржон ва сирғалар;
• қиролича Мария-Амалия ҳамда Нидерландия қироличаси Гортензия де Богарне коллекцияларидан маржон, сирғалар ва тиара;
• шунингдек, Евгения (Наполеон III рафиқаси) коллекциясидан иккита брош, кўйлак безаги учун бант ва тиара.

Евгениянинг тожи ва яна бир номаълум безак буюмини жиноятчилар қочиш чоғида Лувр деворлари ёнида ташлаб кетган.

Франция Маданият вазири Рашида Датининг маълум қилишича, ғараз ниятли шахслар заргарлик буюмларини атиги тўрт дақиқада олиб чиқишга улгурган. Ички ишлар вазири Лоран Нунс эса талончилик етти дақиқа давом этганини билдирган.

Франциянинг маданий қадриятлар ноқонуний савдосига қарши кураш бўлинмаси собиқ ходими Коринн Шартрелга кўра, ўғирланган заргарлик буюмлари Антверпен каби халқаро олмос савдо марказларига етказилиши эҳтимоли юқори. У ерда бундай буюмларнинг келиб чиқиши билан унча қизиқмайдиган шахслар топилиши мумкин.

Art Recovery International асосчиси Кристофер Маринелло эса олмос ва олтин қисмларга ажратилиб, эритилиши мумкинлигини, бу уларнинг келиб чиқишини яшириши ва музейга қайтариш имкониятини деярли имконсиз қилишини таъкидлаган. Унинг айтишича, заргарлик буюмлари қайтарилиш кўрсаткичи бошқа санъат асарларига нисбатан анча паст.

Эслатиб ўтамиз, аввалроқ Telegram асосчиси Павел Дуров Франция ҳукуматини кескин танқид қилиб, Лувр музейидан буюмлар ўғирланишини мамлакатнинг таназзули билан боғлаганди. Шунингдек, у ўғирланган буюмларни сотиб олиб, Абу-Дабидаги Лувр музейига қўймоқчи эканини ҳам очиқлаган.