Трампга қарши қўзғалган Лос Анжелесда нималар бўляпти? (фоторепортаж)

Айни дамда АҚШнинг Калифорния штати, Лос Анжелес шаҳрида Президент Дональд Трампнинг миграция сиёсатига нисбатан норозилик намойишлари авжига чиққан. Бу эндиликда фақатгина аҳолининг Оқ уйга қаршилик ҳаракати эмас, балки штат губернатори ва Президент ўртасидаги “жанг”га ҳам айланди.

Намойишларда асосан Мексика байроғи кўзга ташланмоқда. Шунингдек, Салвадор давлат рамзи ҳам учраб турибди. Бу эса ўз-ўзидан мазкур жараёнда Марказий Америкадан келган муҳожирлар фаол эканини кўрсатади.

Намойишчилар баъзи кўчаларни тўсиб қўйиб, полиция билан ҳам тўқнашган. Ҳуқуқ-тартибот органлари кўздан ёш оқизувчи газ ва шовқинли гранаталардан фойдаланган, аҳоли бунга мушаклар билан жавоб қайтарган.

Бу орада тармоқларда Лос Анжелесда кескин тус олган намойишларда талончилик ҳолатлари ҳам учраётгани, ҳуқуқ-тартибот органлари буни назорат қила олмаётгани ҳақида хабарлар тарқалди.

Намойишларни бостиришда эса ҳатто журналистларга ҳам резинка ўқ узилаётган тасвирлар тарқалди. Унда австралиялик мухбир жабрланганини кўриш мумкин. Юзлаб намойишчилар ҳибсга олинган.

Намойишлар кучайиши фонида Трамп ҳам ортга қайтиш ёки ён бериш ҳақида ўйламаяпти. У чораларни борган сари кучайтиряпти. Буни АҚШ Президенти дастлаб Лос Анжелесга 2000 Миллий гвардия ходими ташлагани, кейинчалик эса уларнинг сонини 4000 га оширганидан билиб олиш қийин эмас. Ҳатто намойишларни бостириш учун 700 нафар денгиз кучлари пиёдалари ҳам юборилди.