Ливанда Башар Асаднинг қариндошлари қўлга олинди

Кеча, 27 декабрь куни Ливан ҳукумати Байрутнинг Рафиқ Ҳаририй номидаги халқаро аэропортида Башар Асаднинг амакиваччаси Дураид Асад, унинг рафиқаси ва қизини сохта паспорт билан мамлакатни тарк этишда айблаб ҳибсга олди. Бу ҳақда “Al-Quds Al-Arabi” газетаси хабар берди.

Нашрнинг ёзишича, Ливан суд тизими Дураид Асаднинг рафиқаси ва қизини сохта паспортлари борлиги аниқлангандан кейин уларни ҳибсга олиш тўғрисида қарор қабул қилган. 

Бунга қадар Ливан ҳуқуқ-тартибот органлари мамлакат ҳудудида Башар Асаднинг юқори мартабали сиёсатчилари ва куч тузималари вакиллари яширинаётганини расман рад этаётганди.

Маълумот учун, Дураид Асад – Ҳофиз Асаднинг укаси Рифат Асаднинг ўғлидир. Араб ОАВнинг маълум қилишича, Дамашқдаги воқеалардан кейин Рифат Асад оиласи билан Ливанга ўтиб кетган. 

Эслатиб ўтамиз, аввалроқ Сурия собиқ президенти Башар Асаднинг рафиқаси Асма Асадни даволаётган шифокорлар уни бошқа одамлар билан алоқада бўлмаслиги учун изоляцияга олганди. Унинг яшаб кетиш эҳтимоли “50/50” деб баҳоланмоқда. Бошқа бир манба эса охирги бир неча ҳафта ичида Асма Асаднинг аҳволи жуда оғир бўлганини қайд этган. Асма Асадни инфекцион касалликлар хавфи туфайли бошқа одамлар билан алоқада бўлмаслиги учун алоҳида сақлашмоқда.

Моҳимбегим Маъруфалиева