Башар Асаднинг рафиқаси лейкемия туфайли изоляцияга олинган – ОАВ

Сурия собиқ президенти Башар Асаднинг рафиқаси Асма Асадни даволаётган шифокорлар уни бошқа одамлар билан алоқада бўлмаслиги учун изоляцияга олган. Унинг яшаб кетиш эҳтимоли “50/50” деб баҳоланмоқда. Бу ҳақда “The Telegraph” нашри хабар берди.

“Асма ўлим ёқасида. У ўзининг аҳволи туфайли ҳеч ким билан бир хонада бўла олмайди”, дейди нашр манбаларидан бири.

Бошқа бир манба эса охирги бир неча ҳафта ичида Асма Асаднинг аҳволи жуда оғир бўлганини қайд этган.

Нашр маълумотларига кўра, Асма Асадни инфекцион касалликлар хавфи туфайли бошқа одамлар билан алоқада бўлмаслиги учун алоҳида сақлашмоқда. Москвада бир муддат унга унинг отаси Фавоз аль-Ахрос қараган. Бироқ аль-Ахрос ҳам Асманинг аҳволи туфайли оғир руҳий ҳолатга тушган.

Нашрнинг ёзишича, Асма Асад Москвага даволаниш учун эрининг ҳокимияти ағдарилишидан олдинроқ келган.

Маълумот учун, 49 ёшли Асма Британия ва Сурия фуқаролигига эга. 2024 йилнинг май ойида Сурия президенти девони унда ўткир миелоид лейкемия (қон саратони) аниқланганини хабар қилган эди. Бу касаллик суяк илиги фаолиятини зарарлайдиган тажовузкор онкологик касаллик ҳисобланади. Бунгача Асма Асад 2019 йилда кўкрак саратонидан тўлиқ даволанганини эълон қилган.

Асма Асад Лондонда туғилиб ўсган ва Британияда JP Morgan банкида инвестицион банкир бўлиб ишлаган. У 2000 йилда Башар Асадга турмушга чиққан, ўша йили Башар Асад Сурия президенти бўлган.

Туркиянинг “Haberturk” нашри жорий йилнинг 23 декабрида Асма Асаднинг ажрашиш учун ариза берганини хабар қилди. Нашрга кўра, Асма Москвадаги ҳаёт шароитларидан норози бўлиб, Лондонга қайтишни истаган ва Россиядан чиқиб кетиш учун махсус рухсат сўраган. Бироқ Кремль бу маълумотни рад этган.