Левандовски ҳам “Эль класико”ни ўтказиб юборади

“Барселона” ҳужумчиси Роберт Левандовски чап оёғининг сон мушаклари йиртилгани сабабли бир неча ҳафтага сафдан чиқди. Футболчининг тикланиш муддати жароҳатнинг ривожланишига боғлиқ бўлади. Бу ҳақда “Mundo Deportivo” нашри хабар берди.

Манбага кўра, бу турдаги жароҳатлар одатда учдан олти ҳафтагача бўлган тикланиш даврини талаб қилади. Шундай экан, польшалик форвард жорий йилнинг 26 октябрь куни “Сантьяго Бернабеу”да бўлиб ўтадиган “Реал Мадрид”га қарши “Эль-Класико” учрашувини ўтказиб юборади.

Левандовски 12 октябрь куни Литвада ўтказилган Жаҳон чемпионати саралаш ўйинида Польша терма жамоаси сафида майдонга тушган эди. У учрашувдан сўнг сонидаги оғриқдан шикоят қилган ва Каталонияга қайтгач, “Барселона” базасида тиббий кўрикдан ўтказилгандан сўнг Левандовскида жароҳат аниқланган.

Шунингдек, “Барселона” сафида Жоан Гарсия, Марк-Андре Тер Стеген, Гави ва Дани Олмо ҳам жароҳат сабабли яқин ўйинларда майдонга тушолмайди.

Маълумот учун, Левандовски жорий мавсумда “Барселона” сафида 9 та ўйинда майдонга тушиб, 4 та гол уришга эришган.

Эслатиб ўтамиз, аввалроқ “Барселона” жамоаси яна бир ҳужумчиси Ферран Торрес ҳам жароҳат олиб терма жамоа машғулотларини тарк этгани ҳақида хабар берилганди.