“Кулол мўндида сув ичар”. Ироқ ҳам Туркманистондан газ олади 

Туркманистон Эрон орқали Ироққа газ етказиб беришни режалаштирмоқда. Бу ҳақда Туркманистон Ташқи ишлар вазирлиги хабар берди.

Türkmengaz ва Ироқ электроэнергетика вазирлиги ўртасида тузилган битимга кўра, Туркманистондан Ироққа 5 йил давомида ҳар йили 9 млрд куб метр газ экспорт қилинади.

Туркман гази Эрон ҳудудидан ўтган газ трубалар орқали SWAP шартлари асосида Ироққа етказилади. Айни пайтда Türkmengaz раҳбари ва Ироқ Энергетика вазири Зиёд Али Фадел газ олди-сотдиси ҳақидаги битимнинг асосий шартлари бўйича протоколни имзолаган.

"Бу эса Туркманистоннинг жаҳон бозорларига энергия етказиб беришни кенгайтираётганини англатади. Октябрь ойи бошида Türkmengaz давлат концерни ва Ироқ Электр энергетика вазирлиги ўртасида ўзаро англашув меморандуми имзоланган", дейилади бу ҳақдаги хабарда.

Маълумот ўрнида, Ироқ энергия таъминоти борасида муаммоларга дуч келмоқда. Катта газ захираларига қарамай, мамлакат нефть ва газ қазиб олиш зоналаридан ёқилғини электр станцияларига ташиш учун зарур инфратузилмага эга эмас.