Коронавируснинг янги тури аниқланди

Саломатлик

image

Дунёда коронавируснинг Омикрон оиласига тегишли FliRT номли янги варианти тарқалмоқда. Бу ҳақда Ўзбекистон Соғлиқни сақлаш вазирлиги хабар берди.

Турли мамлакатларда коронавируснинг янги FLiRT вариантлари, жумладан, вируснинг KP.2, KP.1.1, KS.1 турлари билан касалланиш ҳолатлари аниқланмоқда. Уларнинг барчаси аввалги турларга қараганда хавфсизроқ экани айтилмоқда.

Янги тур генетик коддаги мутациялар номлари шарафига FLiRT деб аталган. FLiRT Омикрон оиласига тегишли бўлиб, дастлабки маълумотларга кўра, бутун дунёда доминантга айланиши мумкин. 

FLiRT белгилари  омикронникига ўхшайди: иситма, йўтал, томоқ, бош ва мушак оғриқлари, ҳолсизлик, таъм ёки ҳид билмаслик.

FLiRT вариантининг тарқалиши туфайли АҚШ Касалликларни назорат қилиш ва олдини олиш маркази (CDC) бу йилги ёзда Америкада коронавирус ҳолатлари кўпайишини тахмин қилмоқда. CDC маълумотларига кўра, март ойининг бошидан бери FLiRTнинг Қўшма Штатлардаги жами коронавирус ҳолатларидаги улуши 11 май ҳолатига кўра 3,8 фоиздан 28,2 фоизгача кўтарилган. 

Буюк Британияда бу вариантлар 15 май ҳолатига кўра, барча ҳолатларнинг 21 фоизини ташкил қилган. Жаҳон соғлиқни сақлаш ташкилоти маълумотларига қараганда, FLiRT 14 та Европа давлатида ва Исроилда аниқланган.

Мутахассисларнинг фикрича, омикроннинг сўнгги турларини беморлар “нисбатан осон” бошдан кечирмоқда, улардан ўлим даражаси юқори эмас. Шунинг учун янги турлардан жиддий ўзгаришларни кутмаса ҳам бўлади. Аммо якуний хулосалар, шу жумладан эмлаш зарурати ҳақида, турли тадқиқотлар натижаларига таяниб, масалан, вирус геномларини ўрганиш асосида гапириш мумкин. 

Мутахассислар нима бўлганда ҳам қўлларни тез-тез ювиш, биноларни шамоллатиш, иш жойлари ва анжомларни дезинфекция қилиш, касаллик белгилари бўлган одамлар билан мулоқот қилмаслик каби профилактика чораларини эътиборсиз қолдирмасликка чақирмоқда.

Эслатиб ўтамиз, шу йил бошида Жаҳон соғлиқни сақлаш ташкилоти дунёда янги пандемия тарқалишидан огоҳлантирганди.

Маъмура Тўраева

 


Мақола муаллифи

avatar

.

Теглар

Коронавирус Ўзбекистон Соғлиқни сақлаш вазирлиги

Баҳолаганлар

0

Рейтинг

3

Мақолага баҳо беринг

Дўстларингиз билан улашинг

online_predictionLive

Барчасиcall_made