Корея дунёдаги энг тезкор поездлардан бирини ишлаб чиқди

Жанубий Кореяда соатига 370 км тезликка чиқа оладиган дунёдаги энг тезкор поездлардан бири ишлаб чиқилиши якунланди. Бу ҳақда “Yonhap” хабар берди.

Нашрнинг Жанубий Корея Транспорт вазирлиги маълумотларига асосланиб ёзишича, янги авлод поезди 370 км/соат тезликда ҳаракатлана олади ва дунёда тезлиги бўйича иккинчи ўринни эгаллайди. Қайд этилишича, унинг техник жиҳатдан максимал тезлиги 407 км/соатни ташкил этади.

Лойиҳада қўлланилаётган технологиялар “EMU-370” деб номланган. Ҳукумат бундай юқори тезликдаги поездларнинг илк нусхаларини ишлаб чиқаришни келаси йилда бошлашни, синовларни эса 2030 йилда ўтказишни режалаштирмоқда. 2031 йилдан кейин эса тижорий фойдаланишга топширилиши кутилмоқда.

EMU-370 тижорий эксплуатацияга киритилгач, дунёда тезлиги бўйича иккинчи ўринни эгаллайди. У ҳозирда 400 км/соат тезликда синовдан ўтаётган ва 2027 йилда ишга туширилиши режалаштирилган Хитойнинг CR450 поездидан ортда қолади.

Вазирлик маълумотларига кўра, ҳозирда Франция, Германия ва Япония каби йирик давлатларда фойдаланилаётган юқори тезликдаги поездларнинг тезлиги тахминан 320 км/соатни ташкил этади.

Маълумот учун, ҳозирда Ўзбекистон бўйлаб энг юқори тезликда ҳаракатланаётган “Афросиёб” – Talgo-250 русумли тезюрар поезди Испаниянинг Patentes Talgo S.L.U. компанияси томонидан ишлаб чиқарилган. Унинг энг юқори тезлиги 250 км/соатни ташкил қилади.

Эслатиб ўтамиз, аввалроқ Хитойнинг CRRC Corporation Limited корпорацияси дунёдаги энг тезкор поезд бўлишга даъвогарлик қилаётган CR450 прототипини синовдан ўтказишни бошлагани ҳақида хабар берилган эди. Пекиндаги экспериментал темирйўл ҳалқасида янги юқори тезликдаги электр поезди CR450 илк бор синовдан ўтказилган. CR450 модели синов давомида 450 км/соат тезликка эришган.