Хитой дунёдаги энг тезкор поезд синовини бошлади

Хитойнинг CRRC Corporation Limited корпорацияси дунёдаги энг тезкор поезд бўлишга даъвогарлик қилаётган CR450 прототипини синовдан ўтказишни бошлади. Пекиндаги экспериментал темирйўл ҳалқасида янги юқори тезликдаги электр поезди CR450 илк бор синовдан ўтказилди. Бу ҳақда ишлаб чиқарувчи компания вице-президенти Ван Фэн “Science and Technology Daily” газетасига маълум қилди.

Янги таркиблар ҳозирда фойдаланилаётган ва 350 км/соат тезликка эриша оладиган CR400 Fuxing поездларига қараганда анча юқори тезлик билан ажралиб туради. Ван Фэннинг сўзларига кўра, CR450 юқори тезликдаги поездлар назарияси, технологияси, ускуналари, стандартлари ва бошқарув тизимида комплекс ютуқ ҳисобланади.

Хитой Транспорт вазирлиги маълумотларига кўра, CR450 модели синов давомида 450 км/соат тезликка эришган. Поезд турли тизимлар ва технологиялар бўйича батафсил баҳоланмоқда.

“Тезлик борасида биз тортиш қуввати, динамик хусусиятлар ва ток қабул қилиш тизимлари каби соҳаларда кенг қамровли техник такомиллаштиришларни амалга оширдик”, деди компания вице-президенти.

Унинг таъкидлашича, ушбу поезд доимий магнитли тортиш двигателларини совитиш учун сув тизими ва янги авлод юқори барқарорликка эга шассилари билан жиҳозланган. Юксак тезликда ҳаракатланишда хавфсизлик фавқулодда тормозлашни бошқаришнинг кўп босқичли технологияси билан таъминланади.

Шунингдек, поездга 4 мингдан ортиқ мониторинг датчиклари ўрнатилган бўлиб, улар реал вақт режимида асосий тизимларни – юриш механизмлари, кузов, юқори кучланишли ток қабул қилувчилар, ҳаракат бошқаруви ва ёнғинни аниқлаш тизимларини кузатиб боради. Бундан ташқари, ултра узоқ масофани аниқлаш қурилмаси хавфли вазиятларни олдиндан сезиш имкониятини оширади.

Экспертлар тахминига кўра, CR450 илк йўловчиларни камида бир йилдан кейин таший бошлайди.

Эслатиб ўтамиз, аввалроқ Хитой 2050 йилгача термоядро синтези технологиясини жорий этиб, тоза энергия ишлаб чиқаришни йўлга қўйишни режалаштираётгани хабар қилинганди. “Сунъий қуёш” деб аталган қурилмаси токамак бўлиб, у кучли магнит майдонлари ёрдамида юқори ҳароратдаги плазмани ушлаб туради ва термоядро реакцияларини давом эттиришга хизмат қилади.