КХДРда тактик баллистик ракета синовдан ўтказилди

КХДРда сочилувчан каллак қисмига эга тактик баллистик ракета ва электромагнит қурол тизими синовдан ўтказилди. Бу ҳақда Корея марказий телеграф агентлиги хабар берди.

Қайд этилишича, электромагнит қурол тизими, углерод толали макетлардан фойдаланган ҳолда снарядларни сочиш, кичик масофага мўлжалланган мобиль зенит-ракета комплексининг жанговар ишончлилиги, шунингдек, сочилувчан каллак қисмига эга тактик баллистик ракетанинг жанговар қўлланилиш имконияти ва энергия сарфини баҳолашни ўз ичига олган синовлар серияси 6 апрелдан 8 апрелгача бўлиб ўтган. Унга Партия Марказий қўмитаси бўлим бошлиғининг биринчи ўринбосари, генерал Ким Чон Сик раҳбарлик қилган.

Синовлар якунига кўра, Баллистик ракета тизимлари илмий-тадқиқот институти “ер-ер” синфига кирувчи “Хвасонпо-11-га” тактик баллистик ракетасининг кассетали каллак қисми 6,5–7 гектар майдондаги нишонларни юқори зичлик билан уриш имкониятини баҳолаган.

8 апрель куни эрталаб КХДР ҳарбийлари Япон денгизи йўналишида бир нечта кичик масофали баллистик ракеталарни учирган. Снарядлар 240 км масофани босиб ўтган.

Эслатиб ўтамиз, аввалроқ Шимолий Корея ўзининг ракета ва сунъий йўлдошларни учиришга мўлжалланган асосий объектларидан бири яқинидаги бир нечта аҳоли пунктини вайрон қилгани, бу эса инфратузилмани кенгайтириш режаларидан далолат бериши ҳақида хабар берилган эди.