Хорватия терма жамоасининг янги мураббийи кимлиги аниқ бўлди

Славен Билич Хорватия миллий терма жамоаси бош мураббийи лавозимига қайтишга розилик берди. Бу ҳақда журналист Алекс Крук ижтимоий тармоқдаги саҳифасида хабар қилди.

Унинг маълум қилишича, Биличнинг тайинлови яқин кунлар ичида расман эълон қилиниши кутилмоқда.

Аввалроқ, жорий йилнинг 8 июль куни Хорватия терма жамоасини 2017 йил октябридан буён бошқариб келган Златко Далич бош мураббийлик лавозимини тарк этган эди.

Далич бошчилигида Хорватия 2018 йил Россияда бўлиб ўтган Жаҳон чемпионатида кумуш, 2022 йил Қатардаги мундиалда бронза, шунингдек, 2023 йилги Миллатлар лигасида кумуш медалларни қўлга киритган. 2026 йилги Жаҳон чемпионатида эса жамоа плей-офф босқичига чиққан бўлса-да, 1/16 финалда Португалияга мағлуб бўлди.

57 ёшли Билич сўнгги марта Саудия Арабистонининг “Ал-Фатеҳ” клубини бошқарган. У мазкур жамоада 2023–2024 йиллар давомида фаолият юритди.

Билич аввал ҳам Хорватия терма жамоасига 2006-2012 йиллар оралиғида мураббийлик қилган. У жамоани 2008 ва 2012 йилги Европа чемпионатларига олиб чиққан.

Мураббийлик фаолияти давомида Билич Туркиянинг “Бешиктош”, Англиянинг “Вест Ҳэм”, “Вест Бромвич Альбион” ва “Уотфорд”, Саудия Арабистонининг “Ал-Иттиҳод” ҳамда Хитойнинг “Бэйцзин Гоань” клубларида ҳам ишлаган.