Каннаваро Италия терма жамоасини бошқаришни орзу қилишини айтди

Ўзбекистон миллий терма жамоаси бош мураббийи Фабио Каннаваро бир кун келиб Италия терма жамоасини бошқариш асосий орзуси эканлигини айтди. Бу ҳақда у “Sky Sport Italia” нашрига берган интервьюсида сўз очди.

“Менинг мақсадим ва орзуим – Италия терма жамоасини бошқариш. Мен бунинг учун шунчаки дунё бўйлаб саёҳат қилиш эмас, балки катта мақсадларга эришиш ниятида меҳнат қиляпман. Муҳим натижаларга эришиш учун астойдил ишлашни хоҳлайман. Мен А Серияда олтита учрашув давомида ишладим ва “Удинезе”ни қуйи лигага тушиб кетишдан сақлаб қолдим. Одатда бундай вазиятларнинг 99 фоизида мураббий билан шартнома узайтирилади, аммо менинг ҳолатимда бошқача қарор қабул қилинди ва мен буни қабул қилдим. Бундан хурсанд бўлмаганман, лекин буни ажойиб клубда орттирилган тажриба сифатида қабул қилдим. У ерда мураббийнинг ривожланиши ва муваффақиятга эришиши учун барча шароитлар мавжуд”, дейди Каннаваро.

Маълумот учун, Фабио Каннаваро 2025 йил октябрь ойида Ўзбекистон миллий терма жамоаси бош мураббийи этиб тайинланган ва Тимур Кападзе ўрнини эгаллаган эди. Италиялик мутахассис Ўзбекистон миллий терма жамоаси билан 2+3 йиллик схема бўйича шартнома имзолаган. Яъни, Каннаваронинг мажбурий шартномаси 2027 йилнинг октябригача амал қилади. У Ўзбекистон терма жамоасигача Италиянинг “Беневенто” ва “Удинезе”, шунингдек, Хорватиянинг “Динамо Загреб” клубларида фаолият юритган.

Эслатиб ўтамиз, аввалроқ инсайдер Фабрицио Романо Осиё кубогининг ўтказилиш муддати кўчирилиши сабабли Каннаваро Ўзбекистон миллий терма жамоаси бош мураббийлигидан кетиш ҳақида ўйлаётганини маълум қилганди. Шундан сўнг, ЎФА ушбу хабарларни ҳақиқатга тўғри келмаслигини айтиб ўтди.