Қурилиш ишлари ноқонуний олиб борилган – Вазирлик бир одам ўлган аварияга муносабат билдирди

Жорий йилнинг 23 июнь куни Қарши шаҳар Ислом Каримов кўчасидаги “Насаф Травел” меҳмонхонаси биносининг ўнг томонидан қўшимча қурилаётган 5 қаватли янги бинонинг том қисмидаги том ёпма қурилмаси (бетон плита) қулаб тушгани ҳақида хабар берган эдик.

Ўзбекистон Республикаси Қурилиш вазирлиги ушбу авария бўйича расмий муносабат билдирди. 

Унга кўра, Қашқадарё вилоят Қурилиш соҳасида ҳудудий назорат инспекцияси томонидан ўрганиш ишлари олиб борилганида, “Насаф-Травел” компаниясига тегишли ушбу объектидаги қурилиш ишлари руйхатга олинмасдан, ноқонуний олиб борилгани маълум бўлди.

“Буюртмачи “Насаф-Травел” компанияси Ўзбекистон Республикаси Вазирлар Маҳкамасининг 2018 йил 18 майдаги “Архитектура ва қурилиш соҳасида давлат хизматлари кўрсатишнинг айрим маъмурий регламентларини тасдиқлаш тўғрисида”ги 370-сон қарорининг, 5-иловаси, яъни, “Қурилиш-монтаж ишларини бошлаш ҳақида хабарнома юбориш бўйича давлат хизматлари кўрсатишнинг маъмурий регламенти”га мувофиқ, Қашқадарё вилоят Қурилиш соҳасида ҳудудий назорат инспекциясини хабардор этмаган”, дейилади вазирлик баёнотида.

Шунингдек, мазкур объект қурилиши бўйича, Қарши шаҳар ҳокимининг 2018 йил 5 июндаги “Насаф-Травел” компаниясига тегишли 4566,92 кв.м ер майдонида жойлашган “Меҳмонхона ва ресторан”ни реконструкция қилишга ҳамда ўз ҳудудидан ёрдамчи бинолар қуришга рухсат этиш тўғрисида”ги қарори билан, “объект атрофини тоза сақлаш, ободонлаштириш ва кўкаламзорлаштириш ишларини доимий бажариш ҳамда объектда қурилиш-монтаж ишларини амалга ошириш учун вилоят давлат архитектура қурилиш назорати инспекциясидан рухсатнома олиш юклатилган” бўлсада, буюртмачи “Насаф-Травел” компанияси томонидан ушбу талаб бажарилмаган.

Инспекция томонидан ушбу объект қурилиши бўйича (2019 йил 29 ноябрда 30-сон ва 2020 йил 28 февралда 141-сон огоҳлантириш хати) буюртмачи “Насаф-Травел” компаниясини бир неча бор огоҳлантирган бўлишига қарамасдан, ноқонуний равишда объектда қурилиш-монтаж ишларини давом эттирган. Ва қурилиш меъёрларининг қўпол равишда бузилиши натижасида мазкур ҳолат келиб чиққан. Тадбиркорлик субъекти қонунда кўрсатилган эркинликларни суистеъмол қилган. Ноқонуний қурилиш ишларини амалга оширган.

Эслатиб ўтамиз, қурилиш объектида юз берган аварияда бир киши ҳалок бўлган.