Қозоғистонга 11 кг наркотик олиб ўтишга уринган шахс ушланди (видео)

Таиланддан олиб келинган наркотик мойини спорт сумкасида Қозоғистонга олиб ўтмоқчи бўлган қозоғистонлик йигит қўлга олинди. Бу ҳақда Давлат хавфсизлик хизмати хабар берди. 

Маълум қилинишича, ДХХ ва Божхона органлари ҳамкорлигида пойтахтнинг Чилонзор туманида амалга оширилган тезкор тадбирда катта миқдордаги гиёҳвандлик воситасининг ноқонуний айланмасига чек қўйилган.

Хусусан, 2004 йилда туғилган Қозоғистон Республикаси фуқаросининг спорт сумкаси белгиланган тартибда текширилганда, унинг ичида ширинликлар ва бошқа маҳсулотлар ниқоби остида қадоқланган, тахминий оғирлиги 11 кг бўлган гашиш мойи борлиги аниқланиб, ашёвий далил сифатида расмийлаштириб олинган. 

Аниқланишича, у Таиланд давлатидан олиб келган ушбу наркотикларни Қозоғистон Республикасига етказиб бериши керак бўлган. 

Ҳозирда унга нисбатан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Амударё орқали 2 кг 32 гр наркотик моддани дронда Ўзбекистонга олиб ўтишга уриниш тўхтатилган эди.