Қонунлар манипуляторларга кескин чора кўриши керак – Алишер Қодиров

Олий Мажлис Қонунчилик палатаси депутати, “Миллий тикланиш” демократик партияси фракциясининг раҳбари Алишер Қодиров ахборот майдонида ҳақорат, камситиш, таҳқирлаш оғир жиноятга тенглаштирилиши ва жиддий жазоланиши кераклигини айтди. Бу ҳақда у ўзининг Telegram саҳифасида ёзиб қолдирди.

У кимгадир адоват сочиш учун “халқ” сўзидан қалқон ясаб олаётганлар ортиб бораётганини ёзган ва халқ фикрини ифода қилиш ҳуқуқи кимга берилгани Конституцияда белгилаб қўйилгани, қолган ҳамма ўз номидан гапириши, муҳокама, мунозара қилиши ва оқибатини зиммасига олишни ўрганиши кераклигини таъкидлаган.

“Афсуски, жуда ёмон тажриба, бизнес ва бошқарув тор манфаатларга эришиш учун шахсият ва фаросатда мажруҳларни интернет тармоғида мувофиқлаштириш ва йўналтиришни ўрганиб олди. Қонунлар бундай манипуляторларни тўхтатиши, ким бўлишидан қатъи назар кескин чора кўриши керак”, дея ёзади Қодиров.

Депутат ўз фикрларини ёзар экан, ахборот лойиҳаларининг оқибатларини Украина инқирози исботлаб берганига ишора қилган.

“Бундай ахборот лойиҳалари вақти билан бошқариб бўлмайдиган махлуққа айланиб кетиб, биринчи навбатда муаллифлари, кейинчалик, минглаб ёшу қари, катта-ю кичикни хонавайрон қилиши мумкинлигини Украина инқирози яққол кўрсатиб бермадими?” дейди у.

Бундан ташқари, Алишер Қодиров тартиб ва маданият чегараларини бузадиган бебошлар билан муросани тўхтатиш кераклигини қайд этган.

“Интернет даромад кўриш билан бирга шахсий қарашларни изоҳ қиладиган майдон эканлиги, албатта, яхши, бу сўнгги даврнинг энг фойдали кашфиётларидан бири, буни олқишлаймиз. Лекин эркинлик экан деб, тартиб ва маданият чегараларини бузадиган бебошлар билан муросани тўхтатиш керак”, дея ёзади фракция раҳбари.

Эслатиб ўтамиз, аввалроқ “Абдуллоҳ” номи билан танилган, 2024 йилнинг октябрь-ноябрь ойларида Корея Республикасида бўлиб турган вақтида ўзининг ижтимоий тармоқлардаги оммавий саҳифалари орқали миллатлараро низо келтириб чиқариши мумкин бўлган, миллий қадриятни таҳқирловчи ҳамда диний эътиқодга кўра фуқароларни камситувчи сўзлар билан Ўзбекистон Республикаси фуқароларига нисбатан қатор ҳақоратли чиқишлар қилиб борган 26 ёшли блогер Югай Валерий қамоққа олингани ҳақида хабар берилганди.