Qirg‘izistonda yana bir hokim qo‘lga olindi

north_east

Hokimlar ovi: Qirg‘izistonda yana bir hokim qo‘lga olindi (video)

Qirg‘izistonning Shopokov shahar hokimligi mansabdor shaxslariga tovar yetkazib berish va xizmatlar ko‘rsatish bo‘yicha davlat xaridlarini o‘tkazish tartib-taomillarini o‘tkazishda korrupsiyaga yo‘l qo‘yganlik holatlari yuzasidan jinoyat ishi qo‘zg‘atildi. Bu haqda Milliy xavfsizlik davlat qo‘mitasi xabar berdi.

Unga ko‘ra, 2023 yildan hozirgi kunga qadar Chuy viloyatining Shopokov shahar hokimligi tomonidan tovarlar va materiallarni xarid qilish bo‘yicha tenderlar o‘tkazilib, unda “Universal Service” va “Matumba” MCHJ g‘oliblar deb e’lon qilingani aniqlangan.

Shu bilan birga, yuqorida tilga olingan korxonalar hokim Nuradil Stanovning topshirig‘iga asosan investitsiyalarni jalb qilish va davlat xaridlari bo‘yicha bosh mutaxassisi K.A.A. tomonidan o‘zining kursdoshlari A.A.M va O.S.O‘.lar nomiga ro‘yxatga olinib, ular kompaniya rahbarlari sifatida rasman qayd etilgan.

Yuqorida qayd etilgan “Universal Service” va “Matumba” mas’uliyati cheklangan jamiyatlarining faoliyatini shahar hokimi va davlat xaridlari bo‘yicha mutaxassis boshqarib, soxta yetkazib berishlarni amalga oshirib, bu orqali shaxsiy boyitish maqsadida byudjet mablag‘larini qonunga xilof ravishda olib qo‘yish bilan shug‘ullangan. Buni xaridlar bo‘limi xodimi K.A.A.ning ko‘rsatmasi ham tasdiqlagan. Byudjet mablag‘larini olib qo‘yish bo‘yicha ushbu korrupsiya sxemasi bevosita Shopokov shahri hokimi Nuradil Stanovning ko‘rsatmasi bilan tashkil etilgan va soxta yetkazib berishdan olingan mablag‘lar o‘zaro taqsimlangan.

Shopokov shahar hokimligining mansabdor shaxslari jinoyatni yashirish maqsadida “Universal Service” MCHJning soxta direktori A.A.M.ga har bir soxta xariddan 1000 somdan 5000 somgacha pul o‘tkazib bergan.

Bundan tashqari, dastlabki tekshirish natijalariga ko‘ra, respublika byudjetiga 9 million somdan ortiq zarar yetkazilgan.

Aniqlanishicha, S.N.S. o‘z mansab mavqeini suiiste’mol qilib, o‘zining yaqin qarindoshini haydovchi etib tayinlagan, u ham “Shopokov-Unaa” kommunal korxonasida haydovchi bo‘lib ishlagan va Qirg‘iziston qonunchiligiga zid ravishda ikki joydan ish haqi olgan.

To‘plangan tergov-tezkor materiallar asosida 2025 yil 3 iyul kuni mazkur mansabdor shaxslar – S.N.S. va K.A.A. ushlanib, Qirg‘iziston Respublikasi Milliy xavfsizlik davlat qo‘mitasi tergov izolyatorining vaqtinchalik saqlash hibsxonasiga joylashtirilgan.

Hozirda Milliy xavfsizlik davlat qo‘mitasi tomonidan davlat organlari va boshqa aloqador shaxslar tomonidan shu kabi faktlarni aniqlash bo‘yicha qo‘shimcha tergov-tezkor tadbirlari o‘tkazilmoqda. 

Eslatib o‘tamiz, avvalroq Qirg‘izistonning Bishkek shahri hokim o‘rinbosari Taalaybek Boygaziyev pora olishda gumonlanib, hibsga olingandi. Shuningdek, To‘qmoq shahri hokimi Maqsad Nusuvaliyev hokimlik yig‘ilishi paytida Milliy xavfsizlik davlat qo‘mitasi rahbari Qamchibek Toshiyevning buyrug‘i bilan hibsga olingandi.