Қашқадарёда 3 кунлик чақалоғини сотишга уринган аёл 2 йилга қамалди

Қашқадарё вилояти Қамаши туманида яшовчи аёл 3 кунлик чақалоғини 60 млн сўмга сотишга уринди ва суд ҳукми билан 2 йилга қамалди. Бу ҳақда “Миллар” дастурида хабар берилди.

Қайд этилишича, Қамаши туманида яшовчи аёл ўзининг илк маротаба дунёга келтирган қиз чақалоғини Қарши шаҳрида яшовчи икки нафар аёлга сотмоқчи бўлади ва бунинг эвазига улардан 60 миллион сўм талаб қилади. Аёл 50 миллион сўм ва 800 долларни Spark русумли автомашина ичида олган вақтда ҳуқуқни муҳофаза қилувчи органлар томонидан қўлга олинган.

Билдирилишича, Жиноят ишлари бўйича Муборак туман судида аёлга 2 йил муддатга озодликдан маҳрум қилиш жазоси тайинланган. Шунингдек, унинг 2024 йилда туғилган қиз фарзанди Китоб туманидаги вилоят болалар уйига топширилиши белгиланган.

Эслатиб ўтамиз, аввалроқ Сурхондарё вилоятида 2024 йилда дунёга келган фарзандини сотмоқчи бўлган 23 ёшли она 6 йил муддатга озодликдан маҳрум қилинган эди.