Қашқадарёда 12 та эчкиэмарни еган эркак жазоланди

Қашқадарё вилоятида Қизил китобга киритилган эчкиэмарларни тутиб, сўйиб еган 61 ёшли эркак жазоланди. 

Билдирилишича, 3 марта инфаркт билан оғриган кекса фуқаро танишларидан эчкиэмар гўшти ва териси касалликка даво эканини эшитиб, ёввойи эчкиэмарларни овлашга тушган.

У биринчи овда 14 бош эчкиэмарни, кейинги сафар 18 бош бўз эчкиэмарни овлаган. Отахон касалликка даво топиш илинжида овлаб келган эчкиэмарларни  пишириб еган.

У 32 бош эчкиэмарнинг 12 тасини гўшти ва терисини еган, қолган 20 тасини кейинчалик ейиш учун уйида боқиб келган. 

Суд эркакка 3 йилга озодликдан чеклаш жазоси белгилаб, Экология вазирлиги фойдасига 141 млн 900 минг сўм ундиришни ҳукм чиқарган.

Эслатиб ўтамиз, жорий йилнинг июнь ойида Қашқадарё вилоятида 43 бош бўз эчкиэмарни ўлдириб, сотиш мақсадида терисини шилган браконьер ушланганди. Июль ойида эса шу вилоятда яшовчи бошқа бир фуқаро ўз хонадонида 9 та бўз эчкиэмари ва 5 та Ўрта Осиё чўл тошбақасини ноқонуний сақлаб келаётгани ҳамда 2 та кўлвор илонини ўлдириб, ҳовлисига осиб қўйгани аниқланганди.