Истанбулдан Тошкентга учаётган самолётда чақалоқ туғилди (видео)

Бугун, 19 июль куни Туркиянинг Истанбул шаҳридан Ўзбекистон пойтахти Тошкент шаҳрига учаётган самолётда йўловчи аёл ўғил фарзанд дунёга келтирди. Бу ҳақда QALAMPIR.UZ манбаси хабар берди. 

QALAMPIR.UZ вазиятга аниқлик киритиш мақсадида “Uzbekistan Airways”авиакомпанияси билан боғланди. Авиакомпания парвоз пайтида йўловчи аёл ўғил фарзандли бўлганини тасдиқлади.

“Бахтли она ва чақалоқнинг аҳволи яхши. Бортда йўловчи сифатида саёҳат қилаётган икки нафар шифокор ўз вақтида ёрдам кўрсатди. Самолёт Урганч аэропортига фавқулодда қўнди”, дейди “Uzbekistan Airways” вакили. 

Аэропортдда она ва янги чақалоқни шифокорлар кутиб олган. Оила тезкор тарзда маҳаллий клиникага етказилган.

Қайд этиш жоиз, бундай ҳолат “Uzbekistan Airways” билан биринчи бор содир бўлаётгани йўқ. 2023 йил апрелда “Uzbekistan Airways”нинг Тошкент-Истанбул рейси бўйича учган самолётда қирғизистонлик аёлнинг кўзи ёриганди. Самолёт Туркия ҳаво ҳудудига киргач, Қирғизистон фуқароси Ситора Абдуманнопованинг туғруқ оғриқлари кучайган. 27 ёшли ҳомиладор аёл самолётда мос жойга ўтказилиб, туғруққа тайёргарлик бошланган. Самолёт капитани йўловчилар орасида шифокор бор-йўқлигини билиш мақсадида эълон қилган. Туғилиш жараёнида кабина экипажи ёрдам берган. 28 ҳафтада туғилган чақалоқ ўғил бола экани маълум қилинган.

Жорий йил бошида эса “Uzbekistan Airways”нинг Тошкент – Нью-Йорк рейси бортида чақалоқ дунёга келган. Самолёт ушбу ҳодисадан сўнг, Исландияга мажбурий қўнган.