Исроил 369 нафар фаластинликни озод қилади

15 февраль куни Ғазо секторида гаровга олинган уч кишининг озод этилиши эвазига 369 нафар фаластинлик озод қилинади. Бу ҳақда ҲАМАС маҳбуслар билан алоқалар бошқармаси хабар берди. 

Қайд этилишича, ушбу 369 фаластинлик орасида 36 нафар умрбод қамоқ жазосига ҳукм қилинганлар ҳам бор.

“Шанба куни келишув доирасида умрбод қамоқ жазосига ҳукм қилинган 36 нафар фаластинлик ва 2023 йил 7 октябрдан кейин ҳибсга олинган 333 нафар ғазолик қамоқдан озод қилинади”, дейилади хабарда. 

Маълумот учун, 19 январь куни Исроил ва ҲАМАС Ғазо секторида ўт очишни тўхтатиш бўйича келишувга эришганди. Ушбу келишув шартларига кўра, 33 нафар исроиллик гаровга олинган шахс қарийб 1900 нафар аксарияти Исроил қамоқхоналарида сақланаётган фаластинлик маҳбусларга алмаштирилиши керак эди. 
8 февраль куни гаровга олинганларни маҳбусларга алмаштиришнинг бешинчи босқичи якунланди: уч нафар исроиллик гаровга олинган шахс озод қилинди ва 183 нафар фаластинлик маҳбус қўйиб юборилди. Умуман олганда, ҲАМАС 16 нафар исроилликни озод қилди, яна 17 нафари ҳаракат қўлида қолмоқда.

Исроил маълумотларига кўра, ушбу 17 кишидан саккиз нафари ҳалок бўлган, яъни Исроил яна тўққиз кишининг озод қилинишини кутмоқда. 

Эслатиб ўтамиз, 10 февраль куни ҲАМАС ҳарбий қаноти матбуот котиби Абу Убайда ҳаракат Ғазо секторида гаровга олинган ва 15 февраль куни ватанига қайтиши керак бўлган янги гуруҳни озод қилиш жараёнини кейинга сурганини маълум қилганди. ҲАМАСнинг фикрича, Исроил “анклав жанубидан шимолга кўчирилганларни қайтаришни кечиктириб, Ғазога қарата ўт очган ва барча турдаги инсонпарварлик ёрдамларини керакли миқдорда етказиб бера олмаганида” келишув шартларини бузган.

11 февраль куни АҚШ Президенти Дональд Трамп ҲАМАСни барча гаровга олинганларни озод қилишга чақирди. Унга кўра, агар бу амалга ошмаса, Ғазо секторида ўт очишни тўхтатиш тартиби бекор қилинади. Шунингдек, Трамп ҲАМАСнинг гаровга олинганларни қисмларга бўлиб эмас, балки бутунлай озод қилиши кераклигини таъкидлаган.

“Шанба куни соат 12:00 да ҳамма гаровга олинганлар озод қилиниши керак, акс ҳолда, мен айтган бўлардимки, ҳақиқий дўзах бошланади”, деган Трамп.

Лекин, ҲАМАС ҳаракати Дональд Трампнинг ушбу талабини рад этди. ҲАМАС матбуот котиби Сами Абу Зуҳрийнинг айтишича, январь ойида Исроил билан эришилган ўт очишни тўхтатиш келишуви гаровга олинганларнинг озод этилишини кафолатлашнинг ягона йўли.

Унинг сўзларига кўра, таҳдидлар тили ўринсиз ва вазиятни янада мураккаблаштиради. Қолаверса, Исроил Бош вазири Биньямин Нетаньяху ҳам агар ҲАМАС ҳаракати жорий йил 15 февраль куни тушгача гаровга олинганларни озод қилмаса, Исроил Ғазо секторида жанговар ҳаракатларни қайта бошлаши ҳақида гапирди.

Кейинроқ Қоҳирадаги музокаралардан сўнг ҲАМАС ҳаракати тўсиқлар бартараф этилганини, гаровга олинганларни озод этиш белгиланган тартибда давом этишини айтди. Воситачи саналган Миср ва Қатар ҳисоботларида ҳам бўшлиқлар бартараф этилгани айтилади.