Айрим испанияликлар ҳам ҳафтада камроқ ишлаши мумкин

Испания Вазирлар Маҳкамаси миллионлаб ходимлар учун стандарт иш ҳафтасини 2,5 соатга қисқартириш ва уни 37,5 соат этиб белгилаш режасини тасдиқлади. Бу ҳақда “Spain in English” хабар берди.

Бироқ, бу қарор ижобий қадам сифатида кўрилаётган бўлса-да, кучга кириши учун у ҳали ҳам парламентнинг розилигини талаб қилади. Испаниянинг Социалистик партияси (PSOE) ва чап қанот Сумар гуруҳи ўртасидаги озчилик коалиция ҳукумати ривожланган дунёнинг энг тез тараққий этаётган иқтисодиётларидан бирида ўзгаришга интилмоқда. Шунга қарамай, таклиф парламентда жиддий муаммоларга дуч келиши кутилмоқда, шунингдек, баъзи тадбиркорлар бу иқтисодий ўсишга тўсқинлик қилиши мумкинлигини айтмоқда.

Сумар билан 2023 йилги коалиция келишувининг бир қисми сифатида, Бош вазир Педро Санчес бошчилигидаги ҳукмрон PSOE иш ҳақини камайтирмасдан тўлиқ кунлик шартнома бўйича иш ҳафтасини 40 соатдан 37,5 соатгача қисқартиришга ваъда берди. Ҳукумат ушбу ўзгаришни 2025 йил охиригача амалга оширишни мақсад қилган.

Узоқ муҳокама қилинган бу ислоҳот тахминан 12 миллион ишчига, хусусан, чакана савдо, меҳмонхона хизмати ва қишлоқ хўжалиги каби соҳалардаги ишчиларга таъсир кўрсатади. Бироқ, давлат сектори ходимлари ва кўплаб йирик компанияларда ишчилар аллақачон 37,5 соатлик иш ҳафтасида ишламоқда.

Меҳнат вазири Йоланда Диас бу чора Испанияни модернизация қилиши ва самарадорликни оширишини таъкидлади. Унинг таъкидлашича, мақсад самарали ишлаш ва ишчиларга янгиланган некбинлик туйғусини беришдир.

Келишув Испаниянинг иккита йирик касаба уюшмалари (CCOO ва UGT) билан ўтган йили эришилган келишувга асосланади. Бироқ, бизнес бирлашмалари 11 ойдан сўнг музокаралардан воз кечиб, потенциал иқтисодий таъсирдан хавотир билдирмоқда. Январь ойида ишсизлик даражаси бироз ошгани сабабли, иш берувчилар Испаниянинг меҳнат бозори заифлик белгиларини кўрсатаётганидан хавотирда ва улар ислоҳот айрим тармоқларга салбий таъсир кўрсатишидан қўрқмоқда.

Ҳозирча қисқартирилган иш ҳафтаси ҳали кучга кирмаган. У Испаниянинг расмий давлат бюллетенида (BOE) эълон қилингандан кейингина расмий бўлади.

Эслатиб ўтамиз, аввалроқ Буюк Британияда 200 та компания ходимларининг иш ҳақини камайтирмасдан, барча учун тўрт кунлик иш ҳафтасини жорий этишга келишиб олганди. Ушбу компаниялар жами 5000 дан ортиқ ходимларни иш билан таъминлайди. Маълумотларга кўра, тўрт кунлик иш ҳафтаси энг кўп хайрия ташкилотлари, маркетинг ва технология соҳаларида оммалашган. Тўрт кунлик иш ҳафтасини қўллаб-қувватловчилар беш кунлик иш ҳафтаси эски иқтисодий давр қолдиғи эканини таъкидлаган.