Ayrim ispaniyaliklar ham haftada kamroq ishlashi mumkin

Ispaniya Vazirlar Mahkamasi millionlab xodimlar uchun standart ish haftasini 2,5 soatga qisqartirish va uni 37,5 soat etib belgilash rejasini tasdiqladi. Bu haqda “Spain in English” xabar berdi.

Biroq, bu qaror ijobiy qadam sifatida ko‘rilayotgan bo‘lsa-da, kuchga kirishi uchun u hali ham parlamentning roziligini talab qiladi. Ispaniyaning Sotsialistik partiyasi (PSOE) va chap qanot Sumar guruhi o‘rtasidagi ozchilik koalitsiya hukumati rivojlangan dunyoning eng tez taraqqiy etayotgan iqtisodiyotlaridan birida o‘zgarishga intilmoqda. Shunga qaramay, taklif parlamentda jiddiy muammolarga duch kelishi kutilmoqda, shuningdek, ba’zi tadbirkorlar bu iqtisodiy o‘sishga to‘sqinlik qilishi mumkinligini aytmoqda.

Sumar bilan 2023 yilgi koalitsiya kelishuvining bir qismi sifatida, Bosh vazir Pedro Sanches boshchiligidagi hukmron PSOE ish haqini kamaytirmasdan to‘liq kunlik shartnoma bo‘yicha ish haftasini 40 soatdan 37,5 soatgacha qisqartirishga va’da berdi. Hukumat ushbu o‘zgarishni 2025 yil oxirigacha amalga oshirishni maqsad qilgan.

Uzoq muhokama qilingan bu islohot taxminan 12 million ishchiga, xususan, chakana savdo, mehmonxona xizmati va qishloq xo‘jaligi kabi sohalardagi ishchilarga ta’sir ko‘rsatadi. Biroq, davlat sektori xodimlari va ko‘plab yirik kompaniyalarda ishchilar allaqachon 37,5 soatlik ish haftasida ishlamoqda.

Mehnat vaziri Yolanda Dias bu chora Ispaniyani modernizatsiya qilishi va samaradorlikni oshirishini ta’kidladi. Uning ta’kidlashicha, maqsad samarali ishlash va ishchilarga yangilangan nekbinlik tuyg‘usini berishdir.

Kelishuv Ispaniyaning ikkita yirik kasaba uyushmalari (CCOO va UGT) bilan o‘tgan yili erishilgan kelishuvga asoslanadi. Biroq, biznes birlashmalari 11 oydan so‘ng muzokaralardan voz kechib, potensial iqtisodiy ta’sirdan xavotir bildirmoqda. Yanvar oyida ishsizlik darajasi biroz oshgani sababli, ish beruvchilar Ispaniyaning mehnat bozori zaiflik belgilarini ko‘rsatayotganidan xavotirda va ular islohot ayrim tarmoqlarga salbiy ta’sir ko‘rsatishidan qo‘rqmoqda.

Hozircha qisqartirilgan ish haftasi hali kuchga kirmagan. U Ispaniyaning rasmiy davlat byulletenida (BOE) e’lon qilingandan keyingina rasmiy bo‘ladi.

Eslatib o‘tamiz, avvalroq Buyuk Britaniyada 200 ta kompaniya xodimlarining ish haqini kamaytirmasdan, barcha uchun to‘rt kunlik ish haftasini joriy etishga kelishib olgandi. Ushbu kompaniyalar jami 5000 dan ortiq xodimlarni ish bilan ta’minlaydi. Ma’lumotlarga ko‘ra, to‘rt kunlik ish haftasi eng ko‘p xayriya tashkilotlari, marketing va texnologiya sohalarida ommalashgan. To‘rt kunlik ish haftasini qo‘llab-quvvatlovchilar besh kunlik ish haftasi eski iqtisodiy davr qoldig‘i ekanini ta’kidlagan.