Испаниядаги поезд ҳалокатида собиқ вазир ҳам қурбон бўлган бўлиши мумкин

Испаниянинг Толедо провинциясида юз берган поездлар тўқнашувида мамлакатнинг собиқ меҳнат вазири Фотима Баньес ҳалок бўлгани ҳақида хабарлар тарқалди. Бу ҳақда “Euronews” нашри хабар берди.

Қайд этилишича, 59 ёшли Баньес 2011–2018 йилларда Испания меҳнат вазири лавозимида ишлаган. У Мадрид–Андалусия йўналишида ҳаракатланган Iryo поездининг сўнгги вагонида бўлган. Собиқ вазир Севилья шаҳрида тадбиркорлар иштирокидаги тадбирда қатнашиш учун кетаётган бўлган.

Маълумотларга кўра, Испаниянинг Халқ партияси (PP) миллий идорасидаги манбалар Баньеснинг ҳалок бўлганини тасдиқлаган. Бироқ у раҳбарлик қилаётган CEOE жамғармаси бу маълумот расман тасдиқланмаганини билдирган.

Ҳодиса ортдан собиқ вазирнинг яқинлари ундан хабар олиш учун воқеа жойига ва Уэлва темирйўл вокзалига йўл олган.

Кеча, 28 октябрь куни содир бўлган тўқнашувда камида 68 киши ҳалок бўлган, 58 киши шифохонага ётқизилган. Қутқарувчилар вайрон бўлган вагонлар орасида қидирув ишларини давом эттирган.

Испания Бош вазири Педро Санчес ҳодиса жойига бориб, ҳалокат сабабларини аниқлаш бўйича тергов ўтказилишини ва келгусида бундай фожиаларнинг олдини олиш учун темирйўл хавфсизлиги кучайтирилишини билдирган.

“Юқори тезликда ҳаракатланувчи поездлар хизматининг хавфсизлигини кучайтиришимиз ва тизимга бўлган ишончни тиклашимиз кераклиги аниқ. Испания каби мамлакатда бир йил ичида иккита юқори тезликдаги поезд ҳалокати содир бўлиши қабул қилиб бўлмайдиган ҳолат”, деган Санчес.

Эслатиб ўтамиз, аввалроқ Испанияда иккита юқори тезликда ҳаракатланувчи поезднинг тўқнашиб кетиши 64 кишининг ўлимига олиб келгани ҳақида хабар берилган эди.