Испания Украинага 4 та Hawk ЗРК юборди

Испания Украинага тўртта Hawk зенит-ракета мажмуасини юборди. Бу ҳақда Украина мудофаа вазири Алексей Резников маълум қилди.

“Менинг испаниялик ҳамкасбим Маргарита Роблесга Украинага тўртта Hawk зенит-ракета мажмуасини юбориш қарори учун раҳмат. Бугун ҳаво ҳужумидан мудофаа нафақат Украина, балки бутун Европа учун устувор вазифадир”, деб ёзди у Twitter’даги саҳифасида.

Кеча, 13 октябрь куни НАТО Бош котиби Йенс Столтенберг Мадриддаги эски Hawk ҳаво мудофаа тизимлари ўрнини Германия, Франция ва АҚШ томонидан етказиб бериладиган замонавийроқ тизимлар тўлдиришини айтганди.

Hawk – Американинг ўрта масофали ҳаво мудофаа тизими бўлиб, у биринчи марта 1960 йилда эксплуатацияга топширилган. 2000-йилларнинг бошида Қўшма Штатлар ундан фойдаланишни тўхтатиб, Hawk’ни замонавийроқ “Stinger” билан алмаштирди, аммо бу тизимлар кўплаб мамлакатларда хизмат қиляпти. Ҳаммаси бўлиб 40 мингга яқин ҳаво мудофаа тизимлари ишлаб чиқарилган, шу жумладан АҚШдан ташқарида ҳам.

Эслатиб ўтамиз, Россия 10 октябрь куни Киев, Днепр ва Украинанинг бошқа бир қатор шаҳарларини кучли ракета зарбаларига дучор қилди. Украина бутун мамлакат бўйлаб ҳаво огоҳлантиришини эълон қилди. Киевда, шунингдек, Украинанинг бошқа ҳудудларида, жумладан Днепр вилояти, Одесса ва Харьковда эрталаб бир қатор портлашлар содир бўлди.

Ички ишлар вазири маслаҳатчиси Ростислав Смирновнинг айтишича, камида 20 киши ҳалок бўлган, 60 га яқин киши жароҳатланган. Портлаш оқибатида олтита автомобиль вайрон бўлган, яна 15 таси зарар кўрган. Маҳаллий Telegram каналлари хабарига кўра, портлашлар Украина хавфсизлик хизмати маъмурияти биноси ҳудудида, шунингдек, Украина Президенти Владимир Зеленскийнинг Володимирска кўчасидаги кабинетларидан бирида содир бўлган. Киев метросида қизил чизиқда поездлар ҳаракати тўхтатилди, барча ерости станциялари бошпана сифатида ишлайди. 

Ҳужум ортидан АҚШ Жо Байден Украинага ҳаво ҳужумидан мудофаа тизимлари етказиб берилишига ваъда берди. Германия эса аввал ваъда қилган хенит-ракета мажмуасини Киевга етказиб берди.