iPhone кўринишида катта ўзгариш бўлиши мумкин

Apple iPhone тарихидаги энг катта янгиланишлар устида ишламоқда. Бу ҳақда “Bloomberg” шарҳловчиси Марк Гурман хабар берди.

Гап икки муҳим қурилма ҳақида кетмоқда: букланадиган iPhone ва 20 йиллик юбилейга бағишланган мутлақо янги дизайндаги iPhone.

Маълумотларга кўра, Apple’нинг аппарат муҳандислиги раҳбари Жон Тернус ушбу катта ўзгаришларни бошқармоқда. У компания раҳбари Тим Кукдан кейин келажакдаги асосий номзод сифатида ҳам кўрилмоқда.

Режага кўра, биринчи букланадиган iPhone шу йил сентябрь ойида тақдим этилиши мумкин. Бу модель Samsung’нинг Galaxy Z Fold линиясига ўхшаб китоб каби очилади. Ички катта экран видео кўриш, ўйин ўйнаш ва бир вақтнинг ўзида бир нечта иловадан фойдаланиш имконини беради. Шу билан бирга, янги iOS 27 тизими айнан букланадиган қурилмага мослаштирилади.

Тахминларга кўра, ушбу телефон 7.7 дюймли ички экран ва 5.3 дюймли ташқи экран билан жиҳозланади. Apple экран букилиш жойидаги изни максимал даражада камайтиришга ҳаракат қилмоқда, лекин уни бутунлай йўқотиш ҳали қийин.

Иккинчи катта янгилик – iPhone’нинг 20 йиллиги учун чиқариладиган модель. Apple илк iPhone’ни 2007 йилда тақдим этган, шунинг учун юбилей модели яқин йилларда чиқиши кутилмоқда. Бу телефон тўлиқ “чегарасиз” дизайнга эга бўлиши мумкин – яъни, экран бутун олд қисмини эгаллайди. Камера эса экран остига жойлаштирилади.

Шунингдек, қурилма эгилган шиша корпусга эга бўлиши мумкин, бу эса унинг ҳозирги моделларидан тубдан фарқ қилади.

Ҳозирча бу режалар расман тасдиқланмаган, аммо агар Apple буларни амалга ошира олса, iPhone учун яқин 1–2 йил жуда катта ўзгаришларга бой бўлиши мумкин.