Индонезияда юқори даражадаги хавфли вулқон отилди (видео)

Кеча, 17 июнь куни Индонезияда вулқон 10 километрдан баландроққа кул булутини отди. Ушбу ҳодиса оролга бораётган ва ундан қайтаётган ўнлаб рейсларнинг бекор қилинишига сабаб бўлди. Бу ҳақда CNN хабар берди.

Интернетда тарқалган суратларда тўқ сариқ рангли қўзиқоринсимон булутнинг Талибура қишлоғи устини қоплагани кўринади. У ҳатто 150 км узоқликдан ҳам кузатилган. Индонезия расмийлари энг юқори даражадаги хавфни эълон қилиб, сайёҳларга бу ҳудудга сафар қилмасликни тавсия этган.

Денпасардаги халқаро аэропорт сайтига кўра, Бали оролида ўнлаб рейслар тўхтатилган. Бу рейслар орасида Жакарта ва Ломбокка ички рейслар, шунингдек Австралия, Хитой, Ҳиндистон, Малайзия, Янги Зеландия ва Сингапурга халқаро парвозлар бор.

Франциск Ксавер Седа номидаги аэропорт хавфсизлик нуқтаи назаридан эртага, 19 июнгача ёпилган. Сингапурдаги Чанги аэропорти сайтида Jetstar ва Scoot авиакомпаниялари бугун, 18 июнь тонгида Балига рейсларини, AirAsia эса Индонезия пойтахтига тушликдаги парвозини бекор қилгани билдирилган.

“Бу вулқон отилиши икки соат ичида 50 марта фаоллик кузатилганидан кейин содир бўлди, бу эса кунлик ўртача 8-10 отилишдан сезиларли даражада юқори”, дейилади хабарда.

Расмийларнинг тасдиқлашича, 18 июнь тонгида баландлиги 1584 метр бўлган “эгизак” вулқонда янги отилиш содир бўлган, оқибатда 1 км баландликка кул устуни чиққан.

Маҳаллий фавқулодда вазиятлар агентлиги ходими Ави Халланнинг айтишича, икки яқин қишлоқдан ўнлаб аҳоли эвакуация қилинган. Кратердан 8 км узоқликда хавфли ҳудуд белгиланган, кучли ёмғир ёғиши эҳтимоли сабабли вулқон дарёлари орқали лава оқимлари хавфи мавжудлиги бўйича огоҳлантириш эълон қилинган.

Қайд этилишича, Левотоби-Лаки-Лаки вулқонининг сўнгги отилиши май ойида содир бўлиб, ўшанда ҳам энг юқори хавф даражаси эълон қилинган.

Маълумот учун, Индонезияда 270 миллиондан ортиқ аҳоли истиқомат қилади. Мамлакатда 120 та фаол вулқон мавжуд бўлиб, сейсмик фаоллик тез-тез рўй беради. Архипелаг Тинч океан ҳавзасини ўраб турган “Олов ҳалқаси” – сейсмик ёриқлардан иборат катта тизим бўйлаб жойлашган.

Эслатиб ўтамиз, аввалроқ Сицилиядаги Этна тоғидан баландлиги 6,5 км (2,3 миля) га етган улкан вулқон кул, газ ва тош устуни отилганди. Италия Миллий геофизика ва вулқоншунослик институти (INGV) маълумотларига кўра, отилиш табиати кратернинг ён томонларидан бирида тош қулаши содир бўлганини кўрсатган.