Илон Маск энди “Америка овози” ва “Озодлик радиоси”ни ёпмоқчи

АҚШ Ҳукумат самарадорлиги департаменти ( DOGE ) раҳбари ва Президент Дональд Трампнинг энг яқин маслаҳатчиларидан бири Илон Маск АҚШ ҳукумати томонидан молиялаштириладиган “Америка овози” ва “Озод Европа/Озодлик радиоси” фаолиятини тугатишга чақирди. Бу ҳақда у ўзининг Х ижтимоий тармоғидаги саҳифасида билдирди.

“Ҳа, уларни ёпинг!

1. Европа аллақачон озод (агар бўғувчи бюрократияни ҳисобга олмасак). Тўғрими?
2. Ҳеч ким уларни энди эшитмайди.

Буларнинг барчаси ўзаро суҳбат қилаётган, шу билан бирга солиқ тўловчиларнинг йилига бир миллиард долларини “ёқиб юбораётган жинни чап радикаллар”, деб ёзди у Президент Трампнинг узоқ йиллик тарафдори Ричард Гренелл бошлаган мунозарада қатнашиб.

Президентнинг махсус топшириқлар бўйича махсус вакили Гренелл ушбу радиостанцияларни ўта чап кун тартибини илгари суришда айблаб, бу “ўтмиш қолдиқлари”ни ёпиш вақти келмадими, деган саволни ўртага ташлаган эди.

Вашингтондаги расмий шахсларнинг ҳеч бири ҳозирча Маскнинг баёнотларига изоҳ бергани йўқ. Бироқ DOGE раҳбарининг USAID – АҚШ Халқаро тараққиёт агентлигини ёпиш ҳақидаги чақириқлари илгари Президент Трамп маъмурияти томонидан тушуниш ва қўллаб-қувватлаш билан қабул қилинган эди.

Эслатиб ўтамиз, АҚШ Давлат бошқаруви самарадорлиги бўйича янги департаментининг (DOGE) раҳбари ва тадбиркор Илон Маск жорий йил 2 февраль куни USAID’ни “жиноятчи ташкилот” деб атаб, унинг “ўлиш вақти келганини” билдирган эди. 3 февраль куни эса Маск Трамп USAID’ни ёпишга рози бўлганини эълон қилди. Шунингдек, DOGE раҳбари агентликни ёпиш жараёни “аллақачон бошланганини” таъкидлади. Ташкилотнинг ўзи эса ходимларига USAID’нинг штаб-квартираси ёпилиши ҳақида электрон хат юборган. Ушбу хатда USAID бош биносида фаолият юритадиган ходимлар масофадан ишлаши, бинонинг иш фаолиятини таъминлаш учун зарур бўлган ходимларнинг эса раҳбарият қарорига кўра ишни давом эттириши таъкидланган. Кейинроқ Америка федерал судьяси Карл Николс АҚШ ҳукуматининг АҚШ Халқаро тараққиёт агентлиги (USAID) ходимларининг 2 минг 200 га яқинини маъмурий таътилга чиқариш тўғрисидаги қарорини тўхтатиб қўйди.