USAID штаб-квартираси ёпилади. Унинг фаолияти сўроқ остида қолмоқда
Олам
−
03 Февраль
3126АҚШ Халқаро тараққиёт агентлигининг (USAID) бош биноси бугун, 3 февраль куни ёпилади. Агентлик ходимларининг аксарияти эса масофадан ишлайди. Бу ҳақда ташкилот ходимларига юборилган электрон хатга асосланиб, “The Washington Post” газетаси мухбири Жон Ҳадсон маълум қилди.
“Агентлик раҳбариятининг кўрсатмасига биноан Вашингтондаги Рональд Рейган биносидаги USAID штаб-квартираси 3 февраль, душанба куни ходимлар учун ёпилади”, дейилади Ҳадсон Х ижтимоий тармоғида эълон қилган хатда.
Шунингдек, ушбу хатда USAID бош биносида фаолият юритадиган ходимлар масофадан ишлаши, бинонинг иш фаолиятини таъминлаш учун зарур бўлган ходимларнинг эса раҳбарият қарорига кўра ишни давом эттириши таъкидланган.
Қайд этиш жоиз, олдинроқ “Fox News” телеканали USAID штаб-квартирасидан барча белгиларнинг олиб ташлангани, Илон Маск жамоаси агентликнинг компьютер тизимларини назоратга олгани ҳақида хабар берган. Хусусан, USAID’нинг 50 дан ортиқ раҳбар ходимлари маъмурий таътилга чиқарилган ва махсус рухсатсиз ташқи алоқа қилишлари тақиқланган. Илон Маск эса ўз баёнотида USAID бутунлай тугатилаётганини таъкидлаб, агентликни қайта тиклаш имконсиз эканини айтган.
Маълумот учун, АҚШ Халқаро тараққиёт агентлиги (USAID) АҚШ ҳукумати таркибига кирувчи мустақил агентлик бўлиб, бошқа мамлакатларга ёрдам бериш мақсадида ташкил этилган. У 1961 йилда ташкил топган ва турли агентликларнинг функцияларини бирлаштирган. Гарчи расмий жиҳатдан мустақил давлат агентлиги бўлса-да, USAID АҚШ Президенти, Давлат котиби ва Миллий хавфсизлик кенгашига бўйсунади. USAID’нинг асосий фаолияти иқтисодий ривожланиш, соғлиқни сақлаш, таълим, гуманитар ёрдам, демократияни қўллаб-қувватлаш ва АҚШ халқаро сиёсий мақсадларини илгари суришдан иборат.
Эслатиб ўтамиз, аввалроқ Дональд Трамп АҚШ Халқаро тараққиёт агентлиги раҳбариятини телбалик ва радикализмда, SpaceX ва Tesla асосчиси Илон Маск эса биологик қуроллар яратишни молиялашда айблаган эди. Маск USAID'ни “жиноий ташкилот” деб атаб, унинг “ўлим вақти” келганини айтди ва ташкилотнинг ёпилишига шама қилди.
LiveБарчаси
06 Февраль