Германиядаги вокзалда пичоқбозлик содир бўлди

Кеча, 23 май куни Германиянинг Гамбург шаҳридаги марказий вокзалда номаълум шахс одамларга пичоқ билан ҳужум қилиши оқибатида камида 12 киши жабрланди. Бу ҳақда “Bild” нашри хабар берди.

Қайд этилишича, 3 нафар жабрланувчининг аҳволи оғир, яна 3 нафари жиддий жароҳат олган, 6 киши эса енгил тан жароҳатлари олган.

Федерал полиция маълумотига кўра, ҳодиса маҳаллий вақт билан соат 18:00 атрофида 13- ва 14-йўлаклар орасидаги платформада содир бўлган. “Bild” нашрининг ёзишича, полиция бир аёлни қўлга олган, аммо унинг ушбу воқеага алоқаси бор-йўқлиги ҳозирча номаълум.

NDR телеканали полицияга таяниб, ҳужумни ёлғиз шахс амалга оширганини ва у аллақачон қўлга олинганини билдирган.

Гамбург полицияси вокзал ҳудудида кенг қамровли махсус амалиёт ўтказилаётганини маълум қилган.

Эслатиб ўтамиз, аввалроқ Германиянинг Шимолий Рейн-Вестфалия федерал еридаги Бедбург-Хау коммунасида руҳий касаллиги бўлган жиноятчилар учун мўлжалланган клиникада беморлар исён кўтарганди. Кейинроқ тартибсизлик уюштирган маҳбуслар полицияга таслим бўлган. Шимолий Рейн-Вестфалия штати ҳуқуқ-тартибот идоралари ходимлари ҳужумчиларни қаршилик кўрсатишни тўхтатишга кўндира олган.