Germaniyadagi vokzalda pichoqbozlik sodir bo‘ldi

Kecha, 23 may kuni Germaniyaning Gamburg shahridagi markaziy vokzalda noma’lum shaxs odamlarga pichoq bilan hujum qilishi oqibatida kamida 12 kishi jabrlandi. Bu haqda “Bild” nashri xabar berdi.

Qayd etilishicha, 3 nafar jabrlanuvchining ahvoli og‘ir, yana 3 nafari jiddiy jarohat olgan, 6 kishi esa yengil tan jarohatlari olgan.

Federal politsiya ma’lumotiga ko‘ra, hodisa mahalliy vaqt bilan soat 18:00 atrofida 13- va 14-yo‘laklar orasidagi platformada sodir bo‘lgan. “Bild” nashrining yozishicha, politsiya bir ayolni qo‘lga olgan, ammo uning ushbu voqeaga aloqasi bor-yo‘qligi hozircha noma’lum.

NDR telekanali politsiyaga tayanib, hujumni yolg‘iz shaxs amalga oshirganini va u allaqachon qo‘lga olinganini bildirgan.

Gamburg politsiyasi vokzal hududida keng qamrovli maxsus amaliyot o‘tkazilayotganini ma’lum qilgan.

Eslatib o‘tamiz, avvalroq Germaniyaning Shimoliy Reyn-Vestfaliya federal yeridagi Bedburg-Xau kommunasida ruhiy kasalligi bo‘lgan jinoyatchilar uchun mo‘ljallangan klinikada bemorlar isyon ko‘targandi. Keyinroq tartibsizlik uyushtirgan mahbuslar politsiyaga taslim bo‘lgan. Shimoliy Reyn-Vestfaliya shtati huquq-tartibot idoralari xodimlari hujumchilarni qarshilik ko‘rsatishni to‘xtatishga ko‘ndira olgan.