Гаитидаги тиқилинчда ўнлаб одамлар ҳалок бўлди (видео)

Кеча, 11 апрель куни Гаити шимолида юз берган тиқилинч оқибатида камида 30 киши ҳалок бўлди. Бу ҳақда маҳаллий Фуқаролик муҳофазаси департаментига таяниб, “La Nouvelliste” хабар берди.

Департамент директори Жан Анри Пети қурбонлар сони яна ортиши мумкинлигини қўшимча қилган. Бундан ташқари, бир неча ўнлаб одамлар жароҳатланган ва улар минтақадаги шифохоналарга ётқизилган.

Тиқилинч Лаферьер цитаделида – Гаити Франциядан мустақилликка эришганидан кўп ўтмай, XIX аср бошида қурилган қалъада содир бўлган. Гаитининг асосий диққатга сазовор жойларидан бири бўлган ушбу обида мамлакат маркалари ва пул купюраларида ҳам тасвирланган.

Ҳукумат маълумотларига кўра, фожиага ташкилий хатоликлар сабаб бўлган: ташриф буюрувчилар оқимини тартибга солиш учун фақат битта кириш эшигидан фойдаланилган, бу эса одамларнинг тез тўпланиб қолишига олиб келган. 11 апрель тонгида қалъа зиёратчилар билан тўлиб кетган. Улар UNESCO Бутунжаҳон мероси объекти шарафига ўтказиладиган ҳар йиллик байрам тадбирида иштирок этиш учун борган.

Эслатиб ўтамиз, аввалроқ Ҳиндистонда ҳар йили ўтказиладиган кўп минглик кортеж пайтида юз берган тиқилинч оқибатида камида 6 киши ҳалок бўлганди ва 50 дан ортиқ киши жароҳат олган эди.