G20 ўзининг асосий маъносини йўқотиши мумкин – Макрон

G20 хавфсизлик ва иқтисодиёт соҳаларидаги глобал инқирозлар билан кураша олмаяпти, бу эса унинг мавжудлик мақсадини хавф остига қўймоқда. Бу ҳақда бугун, 22 ноябрь куни Франция Президенти Эммануэль Макрон Жанубий Африка Республикасининг Йоханнесбург шаҳрида бўлиб ўтаётган “Катта йигирмалик” саммитининг очилишида сўз очди.

Сиёсатчининг айтишича, норасмий халқаро клуб “ўз циклини якунлаш арафасига келган бўлиши мумкин”. Макрон G20 аъзолари йирик инқирозларни ҳал қилишда қийинчиликка дуч келаётганини ва геосиёсий соҳада ягона стандарт белгилашнинг мушкуллигини тан олган.

“Биз аниқ жавоблар ола билмасак, G20 ўз мавжудлигининг маъносини йўқотиши хавфи бор”, дейди Франция Президенти.

У Украина, Яқин Шарқ ва Африка бўйича мавжуд инқирозларни эслаб, уларни тартибга солиш ҳали ҳам имконсиз бўлаётганини қўшимча қилган.

Президентнинг фикрича, айрим давлатлар “жуда кўп тежайди ва жуда кўп ишлаб чиқаради”, бошқалари эса “жуда кўп қарз олади ва ҳаддан ташқари кўп истеъмол қилади”. Бундан ташқари, дунёнинг энг йирик иқтисодиётлари Жаҳон савдо ташкилоти қоидаларига ҳам тўлиқ амал қилмаяпти.

“Менимча, бизга аниқ ва тезкор жавоблар ҳамда имкон қадар кўпроқ аъзоларни жалб қилиш зарур”, дейди Макрон.

Маълумот учун, G20 саммити бугун, 22 ноябрь ва эртага, 23 ноябрь кунлари Йоханнесбургда бўлиб ўтади. Барча сессиялар ва икки томонлама учрашувлар ёпиқ форматда, ОАВсиз ўтказилмоқда.

Жорий йилнинг июль ойи охирида АҚШ Президенти Дональд Трамп Жанубий Африкада бўлиб ўтадиган G20 саммитида қатнашмаслигини ва унинг ўрнига бошқа бировни юбориши мумкинлигини айтиб, мезбон мамлакат “жуда ёмон сиёсат” юритаётганини эълон қилди. Май ойида Жанубий Африка Президенти Сирил Рамафосанинг Оқ уйга ташрифи чоғида Америка етакчиси мамлакатни гўёки оқ танли фермерларни қирғин қилишда айблади.

Сентябрь ойи бошида Трамп яна G20 саммитида қатнашмаслигини эълон қилди. Унинг ўрнига АҚШдан вице-президент Жеймс Дэвид Вэнс қатнашиши кутилган эди. Бироқ, ноябрь ойи бошида Президент мамлакат умуман қатнашмаслигини эълон қилди.

Октябрь ойи охирида Россия Президенти матбуот котиби Дмитрий Песков Владимир Путин G20 саммитида “шахсан иштирок этмаслигини”, аммо мамлакат “яхши даражада вакиллик қилинишини” айтди. Ноябрь ойи бошида Президент маъмурияти аппарати раҳбари ўринбосари Максим Орешкин Россия номидан Жанубий Африкага ташриф буюриши эълон қилинди. Ташқи ишлар вазири Сергей Лавров мамлакатни 2021, 2022, 2023 ва 2024 йилларда вакиллик қилган. Путин пандемия туфайли видеоконференция орқали ўтказилган 2020 йилги саммитда, шунингдек, 2019 йилда Осакада шахсан иштирок этган.