Франциядаги тартибсизликлар: Макрон зўравонликни қоралади, 2,4 минг киши ҳибсга олинди

Францияда бир неча кундан бери давом этаётган тартибсизликлар оқибатида қарийб 2,4 минг киши ҳибсга олинди, полиция ва жандармериянинг мингга яқин ходими жароҳатланди. Франция Президенти Эммануэль Макрон зўравонликни кескин қоралади. Бу ҳақда “The Guardian” хабар берди.

“Бу тасвирларни кўриб, барчамиз французлар ўз мамлакатига қандай қилиб бундай муносабатда бўлиши мумкин, деб ўйладик”, деган Макрон телемурожаатида.

Президент зўравонликни ҳеч нарса билан оқлаб бўлмаслигини билдирган. Унинг айтишича, маҳаллий давлат идоралари зарур деб топса, айрим кўча йиғилишларини тақиқлаши мумкин. Макрон, шунингдек, тинч намойишчиларни биноларни вайрон қилаётган ва дўконларни талаётган гуруҳлардан фарқлаш кераклигини айтган. У тартибсизликларда ўта сўл гуруҳлар ва жиноятчиларни айблаган.

Маълум қилинишича, жорий йилнинг 17 октябрь куни Франциянинг йирик шаҳарларида ўн минглаб одамлар тинч намойишларда қатнашган. Улар мактабларда ўқитувчилар сонини кўпайтириш, таъмирталаб таълим муассасаларини таъмирлаш ва давлат хизматларига кўпроқ маблағ ажратишни талаб қилган. Намойишчиларнинг яна бир қисми яшаш харажатларининг юқорилигидан норозилик билдирган.

Бироқ тинч намойишлардан алоҳида равишда, бошқа гуруҳлар Париж, Бордо, Ницца ва Марсель каби шаҳарларда кўчаларни тўсиб, биноларга ўт қўйган ва полиция билан тўқнашган. Ниқоб таққан талончилар эса тартибсизликлардан фойдаланиб, дўконларнинг ойналарини синдирган ва маҳсулотларни олиб кетган.

Кеча, 18 октябрь куни ҳам Париж марказидаги Республика майдонида намойишчилар полиция билан тўқнашган. Айрим кўчаларда электр велосипедлар ва чиқинди қутилари ёқиб юборилган. Намойишчилар полицияга тош ва шиша идишлар отган, ҳуқуқ-тартибот ходимлари эса кўздан ёш оқизувчи газ ва шовқинли гранаталардан фойдаланган.

Парижда 855 киши ҳибсга олинган. Шаҳар кўчаларида ёқиб юборилган машиналар, синдирилган дўкон ойналари ва баррикадалар қолдиқлари қолган.

Марказий Франциянинг Лимож шаҳрида XIX асрда қурилган шаҳар ҳокимияти биноси ёниб кетган. Шаҳар мэри Гийом Герен ҳужумчилар бино қаравчисига ўлим билан таҳдид қилгани ва сайланган амалдорларга бинoни ёқиб юборишларини айтганини маълум қилди. Унинг айтишича, маҳаллий полиция тартибсизликларни тўхтатишда қийналган, чунки ходимларнинг ўқ-дорилари тугаб қолган.

“Бу давлатнинг улкан муваффақиятсизлиги”, деган Герен.

Марсель шаҳрида эса ниқоб таққан гуруҳлар шаҳар ҳокимияти ва полиция бўлимига бостириб кирган. Шаҳар мэри Бенуа Паян ҳужумчилар аниқ талабларни илгари сурмаганини, аксинча, тинч намойишчиларнинг талабларини обрўсизлантириш мақсадида давлат биноларини вайрон қилганини айтган.

Лион шаҳрида тарихий сайёҳлик ахборот марказига ўт қўйилган.

Савдогарлар уюшмалари маълумотига кўра, тартибсизликлар оқибатида 1,5 мингдан ортиқ дўкон ва корхона талон-торож қилинган. Етказилган зарар ўнлаб миллион еврога баҳоланмоқда.

Франция Ички ишлар вазирлиги 17 октябрь кунги воқеалар вақтида полиция ва жандармериянинг қарийб минг нафар ходими жароҳатланганини, улардан 7 нафари оғир аҳволда эканини маълум қилган. Сен-Этьен шаҳрида 17 ёшли боланинг қўли оломонни тарқатиш учун ишлатилган граната портлаши оқибатида узилиб кетган. Мюлуз шаҳрида эса 17 ёшли қиз бир кўзидан айрилган. Ушбу ҳолат юзасидан тергов бошланган.

Президент Эммануэль Макрон ва ўта ўнгчи сиёсатчи Марин Ле Пен зўравонликларда ўта сўл гуруҳларни айблаган. Бош вазир Себастьян Лекорню эса ҳукумат зўравонликдан қўрқиб, ортга чекинмаслигини билдирган.

Эслатиб ўтамиз, аввалроқ Францияда оммавий намойишлар пайтида Dior, Louis Vuitton, Hermès ва бошқа машҳур брендлар дўконларига ҳужум қилиниб, товарлар ўғирлаб кетилгани ҳақида хабар берилган эди.