Францияда мамлакатдаги тартибсизликларнинг асосий сабаби айтилди

Францияда норозилик намойишлари ва кўча тартибсизликлари оммавий миграция натижасида бошланди. Бу фикрни мамлакат Ташқи разведка бош бошқармаси собиқ раҳбари Пьер Брошан “Le Figaro” нашрига берган интервьюсида билдирди.

Унинг айтишича, асосий муаммо Франция ҳукумати ярим аср давомида илгари сураётган оммавий миграцияни оқлаган ва улуғлаган ҳукмрон мафкурададир. Брошаннинг таъкидлашича, содир бўлган воқеани “фуқаролар уруши” деб бўлмайди, чунки уюшган гуруҳлар ўртасида қуролли тўқнашув бўлмаган.

Бундан ташқари, унинг қўшимча қилишича, намойишларда нафақат французлар, балки хорижликлар ҳам қатнашган. 

"Бир томондан, бу тадбирларда жуда кўп хорижликлар иштирок этган бўлса, бошқа томондан, мен икки фуқароликка эга бўлганлар ва Франция ваколатхоналарига ҳужум қилган фуқаролар ўзларини миллий ҳамжамиятдан четлатишларига ишонаман", деди ташқи разведканинг собиқ раҳбари.

Франциядаги вазият 

Жорий йилнинг 27 июнь куни Парижга яқин Нантер шаҳрида йўл ҳаракати қоидаларини бузган Наэль исмли 17 ёшли жазоирлик йигитни полиция тўхтатган. Бироқ Наэль полицияга бўйсунмаган. Полициячи эса унга қарата ўқ узган. Ҳайдовчи кўкрагига ўқ тегиб вафот этган.  

Шундан сўнг, мамлакатнинг турли шаҳарларида тартибсизликлар бошланган. 29 июнь куни бир неча ўнлаб полиция машиналари, комиссарлик ва маъмурий органлар бинолари ёқиб юборилган, таълим муассасаларига зарар етказилган. 30 июнга ўтар кечаси Ички ишлар вазирлиги давом этаётган тартибсизликларни бостириш учун 40 минг полициячини сафарбар этган. Мамлакатнинг айрим шаҳарларида махсус кучлар кўчаларни патруль қилишда зирҳли техника ва вертолётлардан фойдаланган.

Айрим шаҳарларда соат 21:00 ёки 22:00 дан бошлаб комендантлик соати, шунингдек, тунги вақтда жамоат транспортида чекловлар жорий этилган. Мамлакатда вазият кескинлигича қолмоқда.

Франция Президенти Эммануэль Макрон Twitterʼда марҳумнинг оила аъзолари ва яқинларига ҳамдардлик билдирган. Шунингдек, Макрон Франциядаги тартибсизликлар ортидан ЕИнинг Брюсселдаги саммитини тарк этган. 

Бундан ташқари, Франция Президенти тартибсизликларга компютер ўйинлари сабаб бўлганини айтганди. Франциядаги тартибсизликлар ортидан Бельгия ва Щвейцарияда ҳам намойишлар бўлди.