Францияда кучли бўрон сабаб икки киши ҳалок бўлди

Францияда кузатилган кучли момақалдироқ ва бўронлар оқибатида камида икки киши ҳалок бўлди. Табиий офат сабаб ўн минглаб хонадонлар электр таъминотисиз қолди. Бу ҳақда “Euronews” хабар берди.

Қайд этилишича, жорий йилнинг 16 июль куни кечқурун Франциянинг марказий ва шарқий ҳудудларидаги 30 та департаментда кучли дўл ёғиши ва момақалдироқ хавфи сабабли тўқ сариқ даражадаги огоҳлантириш эълон қилинган.

Юқори Вена департаментидаги Сен-Виктурьен шаҳрида аёл устига дарахт қулаши оқибатида ҳалок бўлган. Шунингдек, Изер департаментининг Доломье шаҳрида чақмоқ уриши ортидан ёнган устахонадан эркак кишининг жасади топилган.

Маълумотларга кўра, кучли бўронлардан кейин 53 мингга яқин хонадон электр таъминотисиз қолган. Айни пайтда ҳудудларда қутқарув ишлари ҳамда электр таъминотини тиклаш ишлари давом эттирилмоқда.

Эслатиб ўтамиз, аввалроқ “Бави” тайфуни Тайвань, Хитой ва Япониянинг айрим ҳудудларида кучли шамол ва жала ёғингарчиликларни келтириб чиқарган эди. Табиий офат оқибатида юз минглаб одамлар эвакуация қилинган ва минглаб хонадонлар электр таъминотисиз қолган эди.