Тайвань, Хитой ва Японияга тайфун ёпирилди. Юз минглаб аҳоли эвакуация қилинди

“Бави” тайфуни Тайвань, Хитой ва Япониянинг айрим ҳудудларида кучли шамол ва жала ёғингарчиликларни келтириб чиқарди. Табиий офат оқибатида юз минглаб одамлар эвакуация қилинди, минглаб хонадон электр таъминотисиз қолди. Бу ҳақда “France 24” хабар берди.

Нашрнинг ёзишича, тайфун бугун, 11 июль куни Тайваннинг шимолий қисми ҳамда Япониянинг жануби-ғарбидаги Окинава оролларига яқинлашган. Тайванда кучли шамол ва жала сабаб 90 мингдан ортиқ аҳоли хавфсиз ҳудудларга кўчирилган, 170 мингдан ортиқ хонадон электр таъминотисиз қолган, шунингдек, юзлаб авиарейс бекор қилинган.

Хитойнинг шарқидаги Чжэцзян вилоятида жойлашган, қарийб 10 миллион аҳоли истиқомат қиладиган Вэньчжоу шаҳри яқинига “Бави” тайфуни 12 июль куни эрталаб етиб бориши кутилган. Шу сабабли маҳаллий ҳукумат хавфсизлик чораларини кучайтириб, 10 июль куни кечгача 887 801 нафар аҳолини олдиндан хавфсиз ҳудудларга кўчирган. Шу билан бирга, кучли ёғингарчилик хавфи сабаб Пекин яқинидаги айрим ҳудудларда 100 мингдан ортиқ киши эвакуация қилинган.

“Ҳеч қандай куч ва маблағни аямасдан амалга оширилаётган кенг кўламли сафарбарлик энг ёмон эҳтимолий сценарийдан ҳимояланишга қаратилган”, дейилади расмий баёнотда.

Япониянинг Окинава префектурасида тайфун оқибатида 18 мингдан ортиқ хонадон ва объект электр энергиясидан узилган. Авиакомпаниялар ўнлаб рейсларни бекор қилган, бунинг натижасида 26 мингдан ортиқ йўловчи парвозларини амалга ошира олмаган.

Филиппинда эса тайфун келтириб чиқарган кучли ёмғирлар ва кўчкилар оқибатида 18 киши ҳалок бўлган. Мамлакат бўйлаб қарийб 11 минг аҳоли эвакуация қилинган, ўнлаб портлар фаолияти вақтинча тўхтатилган ва 313 та кема хавфсиз ҳудудларга олиб чиқилган.

Маълумотларга кўра, тайфун марказидаги шамол тезлиги соатига 137 километр, шамолнинг айрим лаҳзалардаги тезлиги эса 173 километр/соатга етган. Синоптиклар оролнинг шимолий қисмида кучли ёғингарчилик ва қирғоқ ҳудудларида 10 метргача баланд тўлқинлар кузатилиши ҳақида огоҳлантирган.

Мутахассислар сўнгги йилларда океан сувлари ҳароратининг рекорд даражада исиши тропик бўронларнинг кучайишига сабаб бўлаётганини таъкидламоқда. Европа Иттифоқининг “Copernicus” иқлим хизмати маълумотларига кўра, океанларда кузатилаётган юқори ҳарорат ҳамда Эл-Ниньо ҳодисаси бу каби кучли тайфунларнинг шаклланишига қўшимча омил бўлмоқда.

Эслатиб ўтамиз, аввалроқ Филиппиннинг жанубий қисмида юз берган кўчкилар оқибатида камида 15 киши ҳалок бўлгани ҳақида хабар берилганди.