Франция тарихидаги энг иссиқ уч кунни бошдан кечирди

1947 йилдан буён юритиб келинаётган метеорологик кузатувлар тарихида Францияда 23, 24 ва 25 июнь кунлари энг иссиқ уч кун сифатида қайд этилди. Бу ҳақда BFMTV телеканали хабар берди.

Бугун, 25 июнь куни мамлакат бўйича ўртача ҳарорат 30 даражани ташкил этиб, бир кун аввал ўрнатилган рекордни такрорлади. Шу тариқа, сешанба, чоршанба ва пайшанба кунлари 2019 йилда қайд этилган аввалги энг иссиқ уч кунлик рекордни янгилади.

Мамлакатнинг айрим ҳудудларида ҳаво ҳарорати 43 даражадан ошди. Хусусан, Мен ва Луара ҳамда Ланд департаментларида ҳаво 43,2 даражагача, Шер департаментида 42,4 даражагача, Ивелин департаментида эса 42,2 даражагача кўтарилди.

Аномал иссиқлик сабабли 25 июнь куни Франциянинг 96 департаментидан 72 тасида энг юқори — қизил даражадаги об-ҳаво хавфи эълон қилинди. Бугун, 26 июнь куни ҳам 61 департаментда қизил, яна 25 департаментда эса тўқ сариқ хавф даражаси сақланиб қолади.

Франция Миллий таълим вазири Эдуар Жёффренинг маълум қилишича, кучли иссиқ туфайли 3,5 мингга яқин мактаб тўлиқ ёпилган, яна қарийб 10 минг таълим муассасасида дарс жадвали ўзгартирилган ёки машғулотлар салқинроқ хоналарга кўчирилган.

Шунингдек, мамлакатнинг қатор ҳудудларида ёнғин хавфи жуда юқори экани ҳақида огоҳлантириш берилган.

Париж полицияси префекти Патрис Фор бугун, 26 июнь куни соат 18:00 дан бошлаб пойтахтда алкоголли ичимликлар савдоси тақиқланишини, уларни жамоат жойларида истеъмол қилиш эса туш пайтидан бошлаб ман этилишини маълум қилди. Унинг таъкидлашича, экстремал иссиқ шароитида спиртли ичимликлар тез тиббий ёрдам ва қутқарув хизматларига қўшимча юклама юклайди.

Аномал иссиқлик Европанинг бошқа давлатларига ҳам таъсир кўрсатди. Буюк Британияда июнь ойи учун янги ҳарорат рекорди ўрнатилиб, ҳаво 35,7 даражагача исиди. Лондон ва Англиянинг жануби-шарқий қисмида жума оқшомигача қизил хавф даражаси сақланиб қолади.

Швейцариянинг шимоли-ғарбидаги Базель шаҳрида ҳаво ҳарорати 38 даражага етди. Бу июнь ойи учун қарийб 80 йилдан буён сақланиб келган рекорднинг янгиланиши бўлди.

Нидерландия Метеорология институти ҳам ўз тарихида илк бор экстремал иссиқлик бўйича қизил огоҳлантириш эълон қилди. У жума куни мамлакатнинг катта қисмида амал қилади. Айрим ҳудудларда ҳаво ҳарорати 40 даражагача кўтарилиши мумкин. Қизил хавф даражаси Нидерландиянинг 12 провинциясидан 8 тасида жорий этилган.