Франция Гренландияга қўшин юборишга тайёрлигини билдирди
Олам
−
29 Январь
11419Франция Дания билан оролни ҳимоя қилиш учун Гренландияга қўшин юбориш масаласини муҳокама қилди. Бу ҳақда кеча, 28 январь куни Франция Ташқи ишлар вазири Жан-Ноэль Барро маълум қилди.
Бу мавзу АҚШ Президенти Дональд Трампнинг ҳудудни аннекция қилиш ҳақидаги такрорий баёнотлари фонида кўтарилган. Гренландия ҳақида гап кетганда, Трамп Данияга иқтисодий қасос олиш билан таҳдид қилганди ва агар бу давлат унинг ҳудудий амбицияларига қаршилик кўрсатса, у “Данияга жуда юқори даражада тариф қўйишини” таъкидлаганди.
Оқ уй раҳбарининг баёнотлари фонида Дания 500 йилдан бери амал қилиб келаётган давлат гербини ўзгартирди. Дания қироли Фредерик Х гербдан учта тож тасвирини олиб ташлашни буюрган. Ушбу тожлар Даниянинг Норвегия ва Швеция билан бир вақтлар ягона унияда бўлганини ифодалаган. Эндиликда гербда Гренландияни ифодаловчи оқ айиқ ҳамда Фарер оролларини ифодаловчи қўчқор алоҳида акс этган. Дания герби ўзгартирилгани ҳақидаги хабарлар ортидан Трамп Гренландияга ўғлини жўнатишини айтиб, агар орол АҚШнинг бир қисмига айланса, маҳаллий аҳолига “улкан фойда” келтиришга ваъда берганди.
Барронинг аниқлик киритишича, Европа Иттифоқи чегаралари муҳокама қилинадиган мавзу эмас ҳамда ЕИ билан можародан ҳеч ким манфаатдор эмас.
Унинг қўшимча қилишича, Франция Дания Европа Иттифоқига аъзо давлатлардан бирдамлик сўраса, уни қўллаб-қувватлайди, чунки Европа Иттифоқи чегаралари суверен ва дахлсиздир. У яқинда Брюсселда бўлиб ўтган Европа Иттифоқи Ташқи ишлар вазирларининг учрашуви чоғида унинг ҳамкасблари ҳам Копенгагенни “жуда кучли қўллаб-қувватлаши”ни ва агар керак бўлса, қўшин жўнатиш масаласини кўриб чиқишга тайёрлигини билдирган.
Эслатиб ўтамиз, аввалроқ АҚШ Вакиллар палатасидаги республикачилар Президент Дональд Трампга Гренландияни қўлга киритиш учун юридик имкониятлар берадиган лойиҳасини тайёрлаганди. Трамп Мар-а-Лагода нутқ ирод қилаётган бир пайтда унинг ўғли кичик Дональд Трамп Гренландиянинг пойтахти Нуук шаҳрига етиб борганди. У ерга фақат сайёҳ сифатида борганини даъво қилганига қарамай, кичик Трамп “Гренландияни яна буюк қилинг” деб ёзилган бош кийимларни тарқатгани хабар қилинган.
LiveБарчаси
18 Февраль
18 Февраль