Фарғонага “гашиш” олиб кетаётган наркокурьерлар ушланди

Тошкент шаҳридан гиёҳвандлик воситасини Фарғонага олиб кетаётган наркокурьерлар Тошкент вилоятида ушланди. Бу ҳақда вилоят Ички ишлар бош бошқармаси хабар берди.

Маълум қилинишича, вилоятда гиёҳвандлик моддаларига қарши кенг кўламли тадбирлар ўтказилган. Тадбир давомида Тошкент шаҳрида яшовчи шахс қўшни давлатдан контрабанда йўли билан олиб келинган “гашиш” гиёҳвандлик моддасини Бекобод шаҳридаги яшириб қўйилган жойидан олиб, Қўқон шаҳрида яшовчи харидорга олиб кетаётган вақтида қўлга олинган. Қолаверса, унинг олдида бошқа икки фуқаро ҳам бўлган ва улар ҳам қочишга уринганида қўлга тушган.

Олиб борилган терговга қадар текширув давомида ушбу гиёҳвандлик моддаси наркокурьер томонидан кўмиб кетилгани аниқланган.

Мазкур ҳолат юзасидан ушланган шахсга нисбатан Жиноят кодексининг 273-моддаси (гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўзғатилган ҳамда тергов ҳаракатлари олиб борилмоқда.

Эслатиб ўтамиз, аввалроқ Тожикистондан Ўзбекистонга 16 килограмм гиёҳвандлик воситаси олиб келган шахс 15 йилга озодликдан маҳрум қилинганди.