Эрон дунёни интернетсиз қолдириши мумкин – CNN

Эрон Ҳормуз бўғози орқали ўтган кабеллар учун техногигантлардан ҳақ ундириш ниятида, акс ҳолда мамлакат уларни узиб қўйиши мумкин. Бу ҳақда CNN хабар берди.

Телеканал маълумотларига кўра, Ҳормуз бўғози блокада қилинганидан кейин Эрон жаҳон иқтисодиётининг яширин артерияларидан бирини монетизация қилишга (ундан даромад олишга) қарор қилган. Гап Европа, Осиё ва Форс кўрфази ўртасида катта ҳажмдаги интернет-трафик ҳамда молиявий операцияларни узатувчи сувости кабеллари ҳақида бормоқда.

Қайд этилишича, Эрон Ҳормуз бўғози остидан ўтказилган сувости интернет-кабелларидан фойдаланганлик учун дунёнинг энг йирик технологик компанияларидан ҳақ олмоқчи. Агар компаниялар пул тўламаса, уларга трафик узилиши мумкинлиги ҳақида мавҳум тарзда таҳдид қилинмоқда.

“Теҳроннинг бўғоздан даромад олиш режаси Google, Microsoft, Meta ва Amazon каби компаниялардан Эрон қонунчилигига риоя қилишни талаб этади. Шу билан бирга, сувости кабеллари билан шуғулланувчи компаниялар кабель ётқизгани учун лицензия тўловларини тўлаши шарт бўлади, уларни таъмирлаш ва техник хизмат кўрсатиш ҳуқуқи эса эксклюзив тарзда фақат Эрон фирмаларига берилади”, дейилади хабарда.

Телеканалнинг билдиришича, кабелларнинг шикастланиши бутун дунё бўйлаб триллионлаб долларлик маълумотлар узатилишига ва глобал интернет тармоғига уланиш имкониятига салбий таъсир кўрсатиши мумкин.

“АҚШ Президенти Дональд Трампнинг Хитойдан қайтиши ортидан уруш қайта бошланиши мумкинлиги ҳақидаги хавотирлар кучаяр экан, Эрон фақат ҳарбий куч билан чекланиб қолмай, ўз ихтиёрида бошқа қудратли воситалар ҳам борлигини тобора кўпроқ намойиш этмоқда. Бу қадам Ҳормуз бўғозининг нафақат энергия ресурслари экспорти учун муҳимлигини кўрсатади, чунки Теҳрон ўзининг географик таъсирини узоқ муддатли иқтисодий ва стратегик қудратга айлантиришга интилмоқда”, дейилади хабарда.

Эслатиб ўтамиз, аввалроқ АҚШ Эронга тинчлик музокараларини қайта бошлаш учун бажарилиши лозим бўлган 5 та талабдан иборат рўйхатни топширгани ҳақида хабар берилган эди.