Эрдўғаннинг куёви Туркиянинг энг бой одамлари рўйхатига кирди

north_east

Селчук Байроқдор Туркия Президенти бўлиши мумкин — WSJ

Туркия Президенти Ражаб Тойиб Эрдўғаннинг куёви, Baykar Teknoloji компаниясининг эгаси Селчук Байроқдор “Forbes”нинг Туркиянинг энг бой одамлари бўйича дастлабки 20 одамдан бирига айланди. Бу ҳақда “Türkiye Gazetesi” хабар берди.

Baykar акцияларининг 52,5 фоизига эгалик қилувчи Селчук Байроқдор рўйхатда 15-ўринни эгаллаган. У 1,2 миллиард долларлик бойлигини 1,8 миллиард долларга оширишга муваффақ бўлган. Унинг акаси, компания акцияларининг 47,5 фоизига эгалик қилаётган Ҳалук Байроқдор эса 19-ўринда қайд этилган. Ҳалук бойлигини 1,1 миллиард доллардан 1,6 миллиард долларга олиб чиққан.

Сўнгги йилларда мудофаа саноатида стратегик инвестициялар ва ишлаб чиқариш ортиши Baykar Teknoloji'нинг қийматини қатъий равишда оширишга сабаб бўлди. TB2 ва AKINCI каби маҳсулотлар билан бутун дунё бўйлаб таъсир ўтказган компания глобал бозор улушини кенгайтиришда давом этмоқда.

Компаниянинг мудофаа саноатида 100 фоиз маҳаллий ва миллий ишлаб чиқариши миллий ва халқаро миқёсда эътиборни тортди. Бу эса ака-укалар бойлигининг ошишига катта ҳисса қўшди.

Маълумот учун, Селчук Байроқдор компаниянинг директорлар кенгашини бошқаради ва техник директордир. 2016 йилда у Туркия Президенти Ражаб Тойиб Эрдўғаннинг қизи Сумая Эрдўғанга уйланган. Акаси Ҳалук эса Бош директор лавозимини эгаллаган. “Forbes”нинг бутун дунё бўйича рўйхатида 2024 йилда 2410-ўринни эгаллаган Селчук Байроқдор жорий йилда 1875-ўринни қайд этган. Ҳалук Байроқдор эса 2037-ўринда. У ўтган йили 2545-поғонада эди.

Компания 1984 йилда отаси Ўздемир Байроқдор томонидан асос солинган ва кўп йиллар давомида фақат Туркия автомобиль саноати учун эҳтиёт қисмлар ишлаб чиқарган. 2000 йилларда у дронларни ишлаб чиқаришни бошлади.

Baykar’нинг хорижда талаб катта бўлган энг машҳур маҳсулоти Bayraktar дронидир. 2023 йилда Baykar Европа, Африка ва Яқин Шарқдаги қатор ҳамкорлар билан тузилган шартномалар туфайли энг йирик мудофаа етказиб берувчига айланди.

Эслатиб ўтамиз, 2024 йилда Туркия Президенти Ражаб Тойиб Эрдўғаннинг куёви, Baykar Teknoloji компаниясининг 44 ёшли эгаси Селчук Байроқдор “Forbes” рўйхатига киритилганди.