Эрдўғаннинг қасамёдида камида 20 давлат раҳбари қатнашади 

Туркия Президенти Ражаб Тойиб Эрдўғаннинг эртага, 3 июнь куни Анқарада бўлиб ўтадиган инаугурацияси (қасамёди)да камида 20 давлат раҳбари ва 45 вазир иштирок этади. Бу ҳақда маҳаллий матбуот ёзмоқда. 

Айтилишича, Эрдўғаннинг инаугурация маросимида турли мамлакатлардан 20 давлат раҳбари ва 45 вазир иштирок этиши кутилмоқда. Меҳмонлар орасида Озарбайжон Президенти Илҳом Алиев, Қатар амири Шайх Тамим бин Ҳамад Аль Соний ҳам бор. Бундан ташқари, НАТО Бош котиби Йенс Столтенберг ҳам маросимда қатнашиш учун Туркияга бориши кутилмоқда. 

Манбага кўра, Туркия раҳбарининг 3 июнь кунига мўлжалланган махсус дастури мавжуд бўлиб, у Туркия Республикаси асосчиси Мустафо Камол Отатурк мақбарасини зиёрат қилиш, қасамёд қилиш, шунингдек, Вазирлар Маҳкамасининг янги таркибини эълон қилишни ўз ичига олади.

Маълумот учун, кеча, 1 июнь куни Туркия Марказий сайлов комиссияси 28 май куни бўлиб ўтган президентлик сайловларининг иккинчи босқичининг якуний натижаларини эълон қилган. Унга кўра, Эрдўған 52,18 фоиз овоз билан қайта сайланди. Унинг рақиби, мухолифат етакчиси Камол Қиличдарўғли эса 47,82 фоиз овоз олган.

Эслатиб ўтамиз, олдинроқ Туркия Президенти ўзининг ғалабасини хорижлик меҳмонлар билан нишонлаши кутилаётгани айтилганди. Қозоғистон Президенти Қосим-Жомарт Тўқаев, Ўзбекистон Президенти Шавкат Мирзиёев, Қирғизистон Президенти Садир Жапаров ва Покистон Бош вазири Шаҳбоз Шариф ҳам инаугурация маросимида қатнашиш учун Туркияга таклиф этилгани маълум қилинди. Россия томонидан эса инаугурацияда Давлат Думаси спикери Вячеслав Володин иштирок этади.