Mirziyoyev Erdo‘g‘anning inauguratsiyasiga boradi

O‘zbekiston Republikasi Prezidenti Shavkat Mirziyoyev joriy yilning 3 iyun kuni Turkiya Respublikasining saylangan Prezidenti Rajab Toyib Erdo‘g‘anning inauguratsiya marosimida qatnashish uchun Anqara shahriga boradi. 

Aytish joizki, 28 may kuni Turkiyada prezidentlik saylovlarining ikkinchi turi o‘tkazilgan va unda amaldagi Prezident Rajab Toyib Erdo‘g‘an 52,18% ovoz bilan g‘alaba qozongandi. Shu kunning o‘zidayoq Prezident Shavkat Mirziyoyev telefon orqali muloqotda Turkiya Respublikasi Prezidenti Rajab Toyib Erdo‘g‘anni ishonchli, tarixiy g‘alabasi bilan samimiy qutlagandi.

Eslatib o‘tamiz, oldinroq Erdo‘g‘anning inauguratsiya marosimining ehtimoliy sanasi va unga taklif qilinadigan mehmonlar ro‘yxati tuzilayotgani ma’lum qilingandi. Shuningdek, Turkiya Prezidenti o‘zining g‘alabasini xorijlik mehmonlar bilan nishonlashi kutilayotgani aytildi. Qozog‘iston Prezidenti Qosim-Jomart To‘qayev va Pokiston Bosh vaziri Shahboz Sharif ham inauguratsiya marosimida qatnashish uchun Turkiyaga taklif etilgani ma’lum qilingan.