Эрдўған Туркиянинг Европадан ажратиб қўйилганига норозилик билдирди

Туркия Президенти Ражаб Тойиб Эрдўған НАТО давлатлари ўртасида мудофаа саноати соҳасидаги чекловларни бекор қилишга чақирди ва Анқаранинг Европа хавфсизлик ташаббусларида тўлиқ иштирок этиши кераклигини айтди. Бу ҳақда у Анқарадаги НАТО саммити очилишида сўзлаган нутқида гапирди.

“Иттифоқчилар ўртасида мудофаа соҳасидаги ҳамкорликка, айниқса мудофаа саноатига қўйилган чекловлар бекор қилиниши керак. Ақл ва мантиққа асосланган ҳамкорлик модели мавжуд бир пайтда Европа Иттифоқига аъзо бўлмаган иттифоқчиларни четлатиш Европада сунъий бўлинишларга олиб келади”, дейди Эрдўған.

У Туркия 2030 йилгача НАТОнинг ялпи ички маҳсулотнинг 5 фоизини мудофаага сарфлаш бўйича мақсадига эришиш йўлида эканини билдирган. Президентнинг айтишича, мамлакат НАТОнинг ҳаво ва ракетага қарши мудофаа салоҳиятини кучайтириш мақсадида “Steel Dome” (“Темир гумбаз”) ҳаво мудофаа лойиҳаси учун қўшимча 24 миллиард АҚШ доллари ажратган.

Шунингдек, у иттифоқчилар альянс бирдамлигига путур етказмаган ҳолда умумий мудофаа учун кўпроқ масъулиятни ўз зиммасига олиши лозимлигини таъкидлаган.

Қайд этиш жоиз, НАТОда АҚШдан кейинги иккинчи энг йирик армияга эга Туркия сўнгги йилларда қурол-яроғ ишлаб чиқариш ва экспорт қилиш соҳасида муҳим ўйинчига айланди. Анқара бир неча бор SAFE каби Европа хавфсизлик ташаббусларига қўшилиш истагини билдирган бўлса-да, сиёсий ва сиёсатга оид келишмовчиликлар сабабли ҳозиргача бу жараёндан четда қолмоқда.

Эслатиб ўтамиз, кеча, 7 июль куни АҚШ Президенти Дональд Трамп Эрдўған билан бирга чиқиш қилиб, Туркияга нисбатан жорий этилган санкцияларни бекор қилишини ва мамлакатга F-35 қирувчи самолётларини сотиш масаласи бўйича қарор қабул қилишини айтган эди. Бироқ ҳар икки қарор ҳам АҚШ Конгрессида қаршиликка учраши мумкин.