Эрдўған Путин ва Зеленский билан боғлиқ мақсадини айтди

Туркия Президенти Ражаб Тойиб Эрдўған кеча, 22 август куни Россия ва Украина раҳбарлари Владимир Путин ва Владимир Зеленский ўртасида яқин келажакда республикада музокаралар ташкил этишни ўз мақсади деб билишини айтди. 

“Мақсадимиз – [Украинадаги] инқирозни ҳал қилиш учун имкон қадар тезроқ Путин ва Зеленский ўртасидаги учрашувни ташкил этиш”, дейди Туркия раҳбари Анқарада Туркия ҳукумати йиғилиши якунлари бўйича халққа мурожаати чоғида. 

Айни пайтда Эрдўған Украинадаги можарони Туркия ва бутун инсоният учун таъсир қиладиган “дунёдаги энг муҳим инқироз” деб атади.  

"Туркия бу урушнинг олдини олиш ва кейин уни тинч йўл билан тугатиш учун барча саъй-ҳаракатларни амалга оширди. Ғалла инқирозининг олдини олиш механизмини яратиш ҳам бизнинг саъй-ҳаракатларимиз туфайли амалга оширилди. Дунёда ғалла етиштиришнинг учдан биридан кўпроғини Россия ва Украина ташкил этишини ҳисобга олсак, Украина донининг мамлакатимиз орқали жаҳон бозорига жўнатила бошлаганининг ўзиёқ инсоният учун катта воқеадир”, деб ҳисоблайди Туркия Президенти. 

Маълумот учун, 18 август куни Львовда БМТ Бош котиби Антониу Гутерриш, Туркия Президенти Ражаб Тойиб Эрдўған ва Украина Президенти Владимир Зеленский ўртасида уч томонлама учрашув ўтказилди. Сўнг Эрдўған ва Зеленский икки томонлама ҳамкорликни муҳокама қилиш учун алоҳида музокара ўтказди.

Учрашув якунлари бўйича томонлар Запорожье атом электр станцияси атрофидаги ҳарбий ҳаракатлардан хавотирини, Чернобиль фожисини такрор бошдан кечиришни истамасликларини билдирди. 

Мулоқотда Украина донини Қора денгиз орқали жаҳон бозорига олиб чиқишда БМТ ва Туркия бошчилигида йўлга қўйилган самарали мулоқотдан урушни дипломатик йўл билан тугатишда ҳам фойдаланиш мумкинлиги қайд этилган. 

“Мен уруш охир-оқибат музокаралар столида тугашига ишонаман. Аслида, жаноб Зеленский ва Гутерриш бу борада ҳамфикр. Биз музокаралар столига олиб борадиган энг қисқа ва адолатли йўлни аниқлашимиз керак”, деган Эрдўған. 

Гап шундаки, Эрдўған жорий йилнинг 5 август куни Сочига бориб, Президент Владимир Путин билан мулоқот қилганди. Катта эҳтимол билан Эрдўғаннинг Львовга ташрифи Путин билан музокараларнинг мантиқий давоми бўлиши мумкин. Таҳлилчиларнинг фикрича, Эрдўған Путиннинг гапларини оғизмай, томизмай Зеленскийга ва Гутерришга етказган.