“Эр-хотиннинг ажрими учун 1 ой қолганди”. Намангандаги қотиллик бўйича янги тафсилотлар берилди

Наманган давлат университети олдида эркак хотинини ўлдириб, кейин ўз жонига қасд қилганди. Оилани ажрашиши учун суд 6 ой муҳлат бергани ва ҳозиргача 5 ой ўтгани маълум бўлди. Бу ҳақда вилоят оила ва хотин-қизлар бошқармаси хабар қилди.

Маълумотларга кўра, вафот этган аёл 2019 йил 15 сентябрь куни турмушга чиққан. Оиланинг 1 нафар фарзанди бўлган. Келишмовчиликлар сабабли аёл ота уйига кетиб қолган. 2022 йил апрель ойида ушбу оила яраштирилади. 

Келтирилишича, маълум муддатдан сўнг яна оиладаги низолар ортиб борган. Жуда кўп мурожаатлардан сўнг иккала маҳалла фаоллари ажримга хулоса беришга мажбур бўлган. Оилани тиклаш имкони бўлмагани учун судга мурожаат қилинган. Шундан сўнг суд ажрим учун 6 ой муҳлат берган ва ҳозиргача 5 ой ўтган.

Эслатиб ўтамиз, шу йилнинг 6 май куни соат 12:00 да Наманган давлат университети олдида 26 ёшли эркак ўзининг 23 ёшли турмуш ўртоғини хўжалик пичоғи билан қасддан ўлдирганди. Эркак турмуш ўртоғини ўзи билан бирга яшашга мажбур қилиб, асоссиз рашқ қилиб келган ҳолда жанжаллашиб келган. 

Мазкур ҳолат юзасидан Наманган шаҳар прокуратураси томонидан Жиноят кодексининг 97-моддаси билан жиноят иши қўзғатилиб, гумон қилинувчи процессуал тартибда ушланган ва ҳозирда тергов ҳаракатлари олиб борилмоқда.