Эпштейн никоҳcиз муносабатларим орқали шантаж қилишга уринган – Билл Гейтс

Microsoft асосчиси Билл Гейтс АҚШ Конгресси аъзоларига марҳум молиячи ва жинсий жиноятларда айбланган Жеффри Эпштейн уни никоҳдан ташқари муносабатлари орқали шантаж қилишга уринганини айтди. Бу ҳақда Конгресс қўмитаси томонидан эълон қилинган кўрсатма стенограммасида сўз боради.

Аввалроқ, технология соҳасидаги тадбиркор 10 июнь куни Ваколатлар палатасининг назорат қўмитаси олдида ёпиқ эшиклар ортида кўрсатма берганди. Суҳбат асосан унинг 2019 йилда жинсий жиноятлар бўйича суд жараёнини кутаётган вақтда қамоқхонада вафот этган Эпштейн билан муносабатлари ҳақида бўлган.

Жорий йилнинг 23 июнь куни қўмита томонидан ошкор қилинган стенограммага кўра, Гейтс Эпштейннинг “ниқобланган” таҳдидлари ҳақида гапирган. Унинг айтишича, Эпштейн Гейтснинг никоҳдан ташқари муносабатлари ҳақидаги маълумотлардан фойдаланиб, уни ўз таъсир доирасида ушлаб қолишни режалаштирган. Бу вақтда Гейтс аллақачон Эпштейндан узоқлаша бошлаган эди.

“Мен шантаж қилинмадим, аммо бу электрон хатларга қарасангиз, жаноб Эпштейннинг фикрлаш жараёни айнан шу томонга кетганини кўриш мумкин”, деган Гейтс.

Microsoft асосчиси бу ерда АҚШ Адлия вазирлиги томонидан январь ойида эълон қилинган Эпштейн ишига оид ҳужжатларни назарда тутган. У қўшимча саволларга жавоб берар экан, Эпштейн ҳеч қачон унга тўғридан тўғри шантаж сифатида баҳоланиши мумкин бўлган хабар юбормаганини таъкидлаган.

“У менга шантаж деб аташ мумкин бўлган ҳеч қандай хабар юбормаган”, деган у.

Бироқ Гейтснинг фикрича, Эпштейн айрим электрон хатлар лойиҳалари орқали уни қандай қилиб шантаж қилиш мумкинлигини машқ қилаётгандек кўринган.

“У гўё ўзи ёки бошқа бировни менга нисбатан қандай қилиб шантаж қилиш мумкинлигига тайёрлаётгандек эди. Аммо бу хабарларнинг ҳеч бири менга юборилмаган”, деган Гейтс.

Эпштейннинг жиноятлари ҳақида билмаганман – Гейтс

70 ёшли миллиардер кўрсатма бериш куни очилиш баёнотини ҳам эълон қилган. Унда у Эпштейннинг жиноий хатти-ҳаракатларидан хабардор бўлмаганини ва “ҳеч қачон ҳеч кимга жабр етказмаганини” билдирган.

Февраль ойи охирида Гейтс “The Wall Street Journal” нашрига берган интервьюсида Эпштейн билан алоқаларини катта хато деб атаган. Шунингдек, у икки нафар россиялик аёл билан никоҳдан ташқари муносабатларда бўлганини тан олган, аммо Эпштейннинг фаолиятига ҳеч қандай алоқаси бўлмаганини айтган.

Гейтснинг сўзларига кўра, унинг Эпштейн билан муносабатлари 2011 йилда бошланган. Бу Эпштейн вояга етмаган қизлар билан боғлиқ фоҳишалик айбловлари бўйича айбини тан олганидан уч йил кейинги даврга тўғри келади. У Эпштейннинг ҳуқуқий муаммоларидан хабардор бўлганини ҳам тан олган. Бироқ унга Эпштейн глобал соғлиқни сақлаш лойиҳалари учун миллиардлаб доллар жалб қила оладиган инсон сифатида таништирилган.

“Мен бу ҳукм жинсий характерга эга эканини билардим. Аммо тафсилотларни чуқур ўрганмаганман. Балки шундай қилишим керак эди”, деган Гейтс.

Қайд этилишича, ҳужжатларда шахснинг номи тилга олинганининг ўзи унинг қонунбузарликка алоқадорлигини англатмайди. Бироқ Эпштейн ишига оид материаллар камида жинсий жиноятчи ва унинг атрофидаги шахслар билан айрим машҳур жамоат арбоблари ўртасида муайян алоқалар мавжуд бўлганини кўрсатади. Бу шахсларнинг баъзилари кейинчалик бундай муносабатларни камситиб кўрсатган ёки умуман инкор этган.

Эслатиб ўтамиз, аввалроқ ёш қизлар қандай қилиб Эпштейннинг чангалига тушгани ҳақида хабар берилганди.