Эпштейн иши: Трамп 13 ёшли қизни зўрлаган

АҚШ Президенти Дональд Трампнинг исми вояга етмаган қизга нисбатан зўравонлик ҳақидаги иш материалларида яна пайдо бўлди. Гап молиячи ва педофил сифатида танилган Жеффри Эпштейн иши билан боғлиқ янги ҳужжатлар ҳақида бормоқда. Бу ҳақдаги ҳужжатлар АҚШ Адлия вазирлиги томонидан эълон қилинди.

Ҳужжатларга кўра, номаълум шахснинг дугонаси тахминан 35 йил аввал содир бўлган воқеа ҳақида айтиб берган. Унга кўра, жабрланувчи ўша пайтда 13–14 ёшда бўлган ва Дональд Трамп уни мажбуран жинсий ҳаракатларга ундаган.

Қаршилик кўрсатган қиз Трампни тишлаган, шундан сўнг юзига зарба олган. Шу қиз Жеффри Эпштейн томонидан ҳам зўравонликка учрагани айтилади.

Иш бўйича фигурантларнинг исмлари расмий равишда махфийлаштирилган. Дональд Трамп мазкур материаллар эълон қилингач, ҳозирча бу борада изоҳ бермаган.

Қайд этилишича, фош этувчи ҳужжат дастлаб АҚШ Адлия вазирлиги сайтидан олиб ташланган, бироқ бир неча соатдан кейин яна очилган. Вазирлик буни серверлар ҳаддан ташқари юклангани билан изоҳлаган.

Аввал ҳам, 2025 йил декабрь ойида Эпштейн иши билан боғлиқ бошқа ҳужжатларда Трампга нисбатан шунга ўхшаш айбловлар учраган. Жумладан, 2020 йил октябрига оид ҳужжатларда лимузин ҳайдовчисининг кўрсатмаси келтирилади. У 1995 йилда Трампни аэропортга олиб кетаётганда бўлган “жуда безовта қилувчи” телефон суҳбатини эслаган. Ҳайдовчининг айтишича, Трамп суҳбат давомида бир неча бор “Жеффри” исмини тилга олган ва номаълум қизга нисбатан зўравонлик ҳақида гапирган. Шу ҳужжатда номаълум шахс “у мени зўрлаган”, деб айтгани, бу гап Трампга нисбатан айтилгани ҳам қайд этилган.

Яна бир ҳужжатда Эпштейн 14 ёшли қизни Трампга тегишли Мар-а-Лаго курортига олиб келгани ҳақида маълумот бор. Материалларга кўра, молиячи қизни таништирар экан, Трампга қараб “Яхши номзод, тўғрими?” деган, Трамп эса жилмайиб, бош ирғаган.

Трамп, шунингдек, Эпштейн билан алоқаларни узганини айтган. Унинг сўзларига кўра, у Эпштейнни ўз клубидан ҳайдаб чиқарган ва уни “бузуқ” деб ҳисоблаган. Уларнинг дўстлиги 2004 йилда кўчмас мулк бўйича келишмовчилик сабаб тугаган. Шунга қарамай, ундан олдин Трамп ва Эпштейн тахминан 15 йил давомида яқин муносабатда бўлиб, кўп вақтни бирга ўтказган.

Маълумот учун, Жеффри Эпштейн илгари фоҳишаликни ташкил этганлик учун судланган. 2019 йилда у вояга етмаган қизларни жинсий эксплуатация қилишда айбланиб ҳибсга олинган. Ўша йилнинг август ойида у АҚШ қамоқхонасида ўлик ҳолда топилган. Расмий версияга кўра, у ўз жонига қасд қилган, бироқ ҳолат ҳанузгача шубҳали деб баҳоланади.