Энди Ўзбекистонда чиқиндини ёқиш орқали электр ишлаб чиқарилади

Энди Тошкент шаҳри, Андижон, Наманган, Фарғона, Тошкент, Қашқадарё ва Самарқанд вилоятларида қаттиқ маиший чиқиндиларни ёқиш орқали электр энергияси ишлаб чиқарилади. Бу ҳақда Президентнинг кеча, 24 март куни қабул қилинган тегишли қарорларида сўз боради.

Ушбу қарорларга кўра, мазкур ҳудудларда экологик вазиятни яхшилаш, чиқиндиларни қайта ишлаш соҳасига замонавий ечимлар ва технологияларни жорий этиш орқали электр энергияси ишлаб чиқарилади ҳамда соҳага тўғридан тўғри инвестициялар жалб этилади.

Қайд этилишича, инвестор ва лойиҳа компаниялари 2025-2027 йилларда қуйидаги миқдордаги ишлаб чиқариш қувватига эга ускуналарни ишга туширишни таъминлайди, жумладан:

• Тошкент вилоятида кунига 2,5 минг тонна чиқиндиларни термик усулда қайта ишлаш орқали 390 миллион кВт электр энергияси;
• Андижон вилоятида кунига 1,5 минг тонна чиқиндиларни термик қайта ишлаб, 240 миллион кВт электр энергияси;
• Қашқадарё вилоятида кунига 1,5 минг тонна чиқиндиларни термик қайта ишлаб, 240 миллион кВт электр энергияси;
• Самарқанд вилоятида 1,5 минг тонна чиқиндиларни термик қайта ишлаб, 240 миллион кВт электр энергияси;
• Наманган вилоятида 1,5 минг тонна чиқиндиларни термик усулда қайта ишлаш орқали 227,5 миллион кВт электр энергияси;
• Фарғона вилоятида кунига 1,5 минг тонна чиқиндиларни термик усулда қайта ишлаш орқали 227,5 миллион кВт электр энергияси.

Эслатиб ўтамиз, аввалроқ Тошкент вилоятида Хитой компанияси қиймати 120 миллион АҚШ доллари бўлган чиқиндини қайта ишлаш заводи қуришни режалаштиргани ҳақида хабар берилганди. Ушбу лойиҳада 4 минг тонна чиқиндини зарарсиз ёқиш орқали электр энергияси ишлаб чиқариш кўзда тутилганди.