Embraer Legacy бортидагиларнинг Пригожинга қандай алоқаси борлиги маълум бўлди 

 Кеча, 23 август куни Россия Федерал ҳаво транспорти агентлиги Тверь вилоятида ҳалокатга учраган Embraer Legacy самолёти бортида бўлганларнинг исмларини эълон қилди. “Известия” уларнинг кимлигини ва “Вагнер” эгаси Евгений Пригожин билан қандай боғлиқлигини аниқлади.

Ўлган деб эълон қилинганлардан бири Валерий Чекалов “Евро полис” МЧЖ эгаси, шунингдек, Пригожиннинг шериги бўлган. Унинг дўсти Владимир Багаевнинг айтишича, улар илгари ҳарбийларга озиқ-овқат етказиб беришда бирга ишлаган, кейинчалик ишдан ташқари ҳам суҳбатлашиб турган. Чекалов ва Багаев охирги марта ўтган йили Қримда учрашган. Багаев Чекаловнинг фаолияти ҳақида батафсил гапира олмаган, шунингдек, унинг ўлимини ҳам тасдиқламаган.

Дмитрий Уткин – “Вагнер” қўмондони, Россия Қуролли Кучлари Бош штабининг Россия махсус кучлари офицери, у захирадаги подполковник ва тўртта "Жасорат" ордени соҳиби. ОАВ маълумотларига кўра, 2014 йилда у Ростов-на-Дон яқинида ҳарбий ўқув базасини ташкил қилган ва ўз бўлинмаси қўмондони бўлган. Кейинчалик, унинг чақирув белгисига кўра, у "Вагнер" номини олган.

Тахминларга кўра вафот этганлардан бири Сергей Пропустин. Украинанинг "Миротворец" хизматининг маълумотларига кўра, у “Вагнер” аъзоси ва разведчик-гранатометчик бўлган. Ташкилотдаги иштирокини унинг жияни Анастасия Пропустина тасдиқлаган. Шунингдек, унинг қўшимча қилишича, ҳозирча уларга қариндошининг ўлими ҳақида хабар берилмаган.

Ўлганларнинг дастлабки рўйхатида тилга олинган Евгений Макарян ва Александр Тотминнинг ҳам “Вагнер” билан алоқаси бор. Баъзи Интернет ресурсларида улар хусусий ҳарбий компания ходимлари сифатида кўрсатилган.

Embraer Legacy самолётининг уч экипаж аъзоси – самолёт командири Алексей Левшин Санкт-Петербурглик, иккинчи учувчи Рустам Каримов, тахминларга кўра, Пермдан, стюардесса Кристина Распопова эса Екатеринбургдан.

Иккинчи учувчининг рафиқаси Анастасия Каримовага турмуш ўртоғининг ўлими ҳақида хабар берилганини тасдиқлади. У эри билан охирги марта фожиа юз берган куни соат 17:30 лар атрофида гаплашган.

Маълумотларга кўра, Embraer Legacy самолёти ҳавога кўтарилганидан 26 дақиқа ўтиб радарлардан ғойиб бўлган. У Москвадаги Шереметьево аэропортидан Санкт-Петербургдаги Пулковога учган. Шундан сўнг, борт радардан ғойиб бўлган ва экипаж диспетчернинг бир нечта қўнғироқларига жавоб бермаган.

Эслатиб ўтамиз, кеча, 23 август куни Тверь вилоятидаги авиаҳалокат маълум бўлган эди. Тергов қўмитаси Фавқулодда ҳолат факти бўйича жиноят иши қўзғатди.